לפרק הקודם

הבשורה על־פי מתי
פרק טו

מסורת הזקנים

1 אָ֚ז נִגְּשׁ֣וּ אֶל־יֵשׁ֔וּעַ הַסּֽוֹפְרִ֧ים וְהַפְּרוּשִׁ֛ים אֲשֶׁ֥ר מִירֽוּשָׁלַ֖םִ וַיֹּאמֵֽרוּ : 2 מַדּ֨וּעַ֨ עֹֽבְרִ֣ים תַּלְמִידֶ֔יךָ אֵ֖ת מָסוֹרַ֣ת הַזְּקֵנִ֑ים כִּ֣י אֵינָ֤ם רֹֽחֲצִים֨ אֶת־יָדֵיִהֶ֔ם בְּאָכְלָ֖ם לָֽחֶם : 3 וַיַּ֖עַן וַיֹּ֣אמֶר אֲלֵיהֶ֑ם מַדּ֜וּעַ גַּם־אַתֶּ֤ם עֹֽבְרִים֨ אֶת־מִצְוַ֣ת הָֽאֱלֹהִ֔ים בַּֽעֲב֖וּר מְסֽוֹרַתְכֶֽם : 4 כִּ֗י הָֽאֱלֹהִים֨ צִוָּ֣ה לֵאמֹ֔ר כַּבֵּ֥ד אֶת־אָבִ֖יךָ וְאֶת־אִמֶּ֑ךָ וְע֕וֹד מְקַלֵּ֥ל אָבִ֛יו וְאִמּ֖וֹ מ֥וֹת יוּמָֽת : 5 וְאַתֶּם֘ אֹֽמְרִים֒ כֹּ֣ל אֲשֶׁ֤ר יֹאמַר֨ לְאָבִ֣יו א֣וֹ לְאִמּ֔וֹ קָרְבָּ֕ן מַה־שֶּֽׁאַתָּ֥ה נֶהְנֶ֖ה מִמֶּ֑נִּי וְלֹֽא־יְכַבֵּ֥ד אֶת־אָבִ֖יו א֥וֹ אֶת־אִמּֽוֹ : 6 וְהֵֽפַרְתֶּ֛ם אֶת־מִצְוַ֥ת הָֽאֱלֹהִ֖ים בַּֽעֲב֥וּר מְסֽוֹרַתְכֶֽם : 7 הַֽחֲנֵפִ֕ים הֵיטֵ֨ב נִבָּ֧א עֲלֵיכֶ֛ם יְשַׁעְיָ֖הוּ לֵאמֹֽר : 8 נִגָּ֨שׁ אֵלַ֜י הָעָ֤ם הַזֶּה֨ בְּפִ֔יו וּבִשְׂפָתָ֖יו כִּבְּד֑וּנִי וְלִבּ֕וֹ רָח֥וֹק ה֖וּא מִמֶּֽנִּי : 9 וְלַשָּׁ֛וְא הֵ֥ם יְרֵאִ֖ים אֹתִ֑י בְּלַמְּדָ֛ם מִצְו֥וֹת אֲנָשִׁ֖ים לְלִמּוּדִֽים : 10 וַיִּקְרָא֨ אֶל־הֶֽהָמ֔וֹן וַיֹּ֖אמֶר אֲלֵיהֶ֑ם שִׁמְע֖וּ וּבִֽינוּ : 11 לֹ֧א הַדָּבָ֛ר הַבָּ֥א אֶל־הַפֶּ֖ה מְטַמֵּ֣א אֶת־הָֽאָדָ֑ם כִּ֚י אִם־הַיּוֹצֵ֣א מִן־הַפֶּ֔ה ה֖וּא מְטַמֵּ֥א אֶת־הָֽאָדָֽם : 12 אָ֛ז נִגְּשׁ֥וּ תַלְמִידָ֖יו וַיֹּֽאמְר֣וּ אֵלָ֑יו הֲיָדַ֕עְתָּ כִּ֣י הַפְּרוּשִׁ֗ים כְּשָׁמְעָ֛ם אֶת־הַדָּבָ֥ר הַזֶּ֖ה נִכְשָֽׁלוּ : 13 וַיַּ֖עַן וַיֹּאמַ֑ר כָּל־מַטָּ֗ע אֲ֠שֶׁר לֹֽא־נָטַ֥ע אָבִ֛י אֲשֶׁ֥ר בַּשָּׁמַ֖יִם יְשֹׁרָֽשׁ : 14 הַנִּ֨יחוּ֨ לָהֶ֔ם מְנַֽהֲגִ֧ם עִוְרִ֛ים הֵ֖מָּה לָֽעִוְרִ֑ים וְאִ֤ם עִוֵּר֨ יְנַהֵ֣ג עִוֵּ֔ר שְׁנֵיהֶ֖ם בְּפַ֥חַת יִפֹּֽלוּ : 15 וַיַּ֥עַן פֶּטְר֖וֹס וַיֹּ֣אמֶר אֵלָ֑יו הָבִ֣ינָה לָּ֔נוּ אֵ֖ת הַמָּשָׁ֥ל הַזֶּֽה : 16 וַיֹּ֖אמֶר יֵשׁ֑וּעַ הַאִ֨ם גַּ֥ם אַתֶּ֛ם ע֖וֹד בִּבְלִ֥י בִינָֽה : 17 הַע֖וֹד לֹ֣א תָבִ֑ינוּ כִּ֣י כָל־הַבָּ֤א אֶל־הַפֶּה֨ יוֹרֵ֣ד אֶל־הַבֶּ֔טֶן וְיֻשְׁלַ֥ךְ הַח֖וּצָה לְמֹֽחְרָאֽוֹת : 18 אַ֗ךְ הַדְּבָרִים֨ הַיּֽוֹצְאִ֣ים מִן־הַפֶּ֔ה יֽוֹצְאִ֖ים מִן־הַלֵּ֑ב וְהֵ֖ם מְטַמְּאִ֥ים אֶת־הָֽאָדָֽם : 19 כִּ֗י מִן־הַלֵּ֤ב יֽוֹצְאוֹת֨ מְזִמּ֣וֹת רָע֔וֹת רְצִיחוֹת֨ נִֽאֻפִ֣ים ׀ זְנוּנִ֔ים גְּנֵב֕וֹת עֵ֥דוּת שֶׁ֖קֶר וְגִדֻּפֽוֹת : 20 אֵ֚לֶּה הֵ֔מָּה הַמְּטַמְּאִ֖ים אֶת־הָֽאָדָ֑ם אַ֗ךְ אָכוֹל֨ בְּיָדַ֣יִם לֹֽא־מְרֻֽחָצ֔וֹת אֵינֶ֥נּוּ מְטַמֵּ֖א אֶת־הָֽאָדָֽם :

אמונתה של אישה כנענית

21 וַיֵּצֵ֥א יֵשׁ֖וּעַ מִשָּׁ֑ם וַיָּ֕סַר אֶל־חֶלְק֖וֹת צֹ֥ר וְצִידֽוֹן : 22 וְהִנֵּ֞ה אִשָּׁ֣ה כְנַֽעֲנִ֗ית יָֽצְאָה֨ מִן־הַגְּבוּלִ֣ים הָהֵ֔ם וַתִּצְעַ֥ק אֵלָ֖יו לֵאמֹ֑ר אֲדֹנָי֨ בֶּן־דָּוִד֨ רַחֵ֣ם עָלַ֔י בִּתִּ֛י מְעֻנָּ֥ה מְאֹ֖ד בְּשֵֽׁד : 23 וְה֕וּא לֹֽא־עָנָ֥ה אֹתָ֖הּ דָּבָ֑ר וַיִּגְּשׁ֨וּ תַלְמִידָ֜יו וַיִּשְׁאֲל֤וּ מִמֶּ֨נּוּ֨ לֵאמֹ֔ר שַׁלַּ֣ח אֹתָ֔הּ כִּ֛י הִ֥יא צֹעֶ֖קֶת אַֽחֲרֵֽינוּ : 24 וַיַּ֖עַן וַיֹּאמַ֑ר לֹ֣א נִשְׁלַ֔חְתִּי זֽוּלָתִ֛י אֶל־צֹ֥אן בֵּֽית־יִשְׂרָאֵ֖ל הָאֹֽבְדֽוֹת : 25 וַתָּבֹ֛א וַתִּשְׁתַּ֥חוּ ל֖וֹ לֵאמֹ֑ר אֲדֹנָ֖י הֽוֹשִׁיעֵֽנִי : 26 וַיַּ֖עַן וַיֹּאמַ֑ר לֹ֣א יָפֶ֗ה לָקַ֨חַת֨ אֶת־לֶ֣חֶם הַבָּנִ֔ים וּלְהַשְׁלִ֖ךְ לַכְּלָבִֽים : 27 וַתֹּ֖אמֶר כֵּ֣ן אֲדֹנָ֑י אֶ֗פֶס גַּם֚ הַכְּלָבִים֨ אֹֽכְלִ֔ים מִ֨ן־הַפְּתוֹתִ֔ים הַנֹּֽפְל֖וֹת מִשֻּׁלְחַ֥ן אֲדֹֽנֵיהֶֽם : 28 וַיַּ֨עַן יֵשׁ֜וּעַ וַיֹּ֣אמֶר אֵלֶ֗יהָ אִשָּׁה֙ גְּדוֹלָ֣ה אֱמֽוּנָתֵ֔ךְ יְהִ֥י לָ֖ךְ כַּֽאֲשֶׁ֣ר תִּרְצִ֑י וַתֵּֽרָפֵ֥א בִתָּ֖הּ מִן־הַשָּׁעָ֥ה הַהִֽיא :

ריפוי חולים

29 וַיַּֽעֲבֹ֤ר יֵשׁ֨וּעַ֙ מִשָּׁ֔ם וַיָּבֹ֕א עַ֖ד יַם֣ הַגָּלִ֑יל וַיַּ֨עַ֙ל אֶל־הָהָ֔ר וַיֵּ֖שֶׁב שָֽׁם : 30 וַיִּגְּשׁ֣וּ אֵלָיו֘ הֲמוֹנִ֣ים רַבִּים֒ אֲשֶׁר֩ הָי֨וּ לָהֶ֜ם עִמָּהֶ֗ם פִּסְּחִ֤ים עִוְרִים֙ חֵֽרְשִׁ֣ים נְכָאִ֔ים וַֽאֲחֵרִ֖ים רַבִּ֑ים וַיַּשְׁלִ֤יכוּ אֹתָם֨ לְרַגְלֵ֣י יֵשׁ֔וּעַ וַיִּרְפָּ֖א אֹתָֽם : 31 עַד֩ אֲשֶׁ֨ר תָּֽמְה֜וּ הַֽהֲמוֹנִ֗ים בִּרְאוֹתָ֞ם חֵֽרְשִׁ֤ים מְדַבְּרִים֨ וּנְכָאִ֣ים שְׁלֵמִ֔ים פִּסְחִ֥ים מִתהַלְּכִ֖ים וְעִוְרִ֣ים רֹאִ֑ים וַיְכַבְּד֖וּ אֶת־אֱלֹהֵ֥י יִשְׂרָאֵֽל :

ישוע מאכיל ארבעת אלפים איש

32 וַיִּקְרָ֨א יֵשׁ֣וּעַ אֶל־תַּלְמִידָיו֘ וַיֹּאמַר֒ נִכְמְר֤וּ רַֽחֲמַי֨ עַל־הֶֽהָמ֔וֹן כִּ֣י זֶ֞ה שְׁלֹ֤שֶׁת יָמִים֨ נִלְו֣וּ עִמִּ֔י ואֵ֥ין לָהֶ֖ם מָ֣ה לֶֽאֱכֹ֑ל וּלשַׁלַּ֨ח אֹתָ֤ם צָמִים֨ לֹ֣א אֹבֶ֔ה פֶּן־יִתְעַלְּפ֖וּ בַּדָּֽרֶךְ : 33 וַיֹּֽאמְר֥וּ אֵלָ֖יו תַּלְמִידָ֑יו מֵאַ֨יִן לָ֜נוּ בְּמִדְבָּ֗ר כִּכְּר֨וֹת לֶ֤חֶם ׀ רַבּוֹת֨ כָּאֵ֔לֶּה עַ֧ד לְהַשְׂבִּ֛יעַ הָמ֥וֹן רָ֖ב כָּזֶֽה : 34 וַיֹּ֤אמֶר יֵשׁ֨וּעַ֨ אֲלֵיהֶ֔ם כַּמָּ֥ה לֶ֖חֶם יֵ֣שׁ לָכֶ֑ם וַֽיֹּאמְר֣וּ ׀ שֶׁ֔בַע וּמְעַ֖ט דָּגִ֥ים קְטַנִּֽים : 35 וַיְצַו֨ אֶת־הַֽהֲמוֹנִ֔ים לָשֶׁ֖בֶת עַל־הָאָֽרֶץ : 36 וַיִּקַּ֞ח אֶת־שֶׁ֨בַע כִּכְּר֤וֹת הַלֶּ֨חֶם֨ וְאֶת־הַדָּגִ֔ים וַיְבָ֣רֶךְ וַיִּפרֹ֔ס וַיִּתֵּ֖ן אֶל־תַּלְמִידָ֑יו וְהַתַּלְמִידִ֖ים אֶל־הֶֽהָמֽוֹן : 37 וַיֹּֽאכְל֥וּ כֻלָּ֖ם וַיִּשְׂבָּ֑עוּ וַיִּשְׂאוּ֨ אֶת־הַנּוֹתָ֣ר מִן־הַפִּתִּ֔ים שִׁבְעַ֥ת דּוּדִ֖ים מְלֵאִֽים : 38 וְהָאֹֽכְלִים֨ הָי֔וּ אַרְבַּ֥עַת אֲלָפִ֖ים אֲנָשִׁ֑ים מִלְּבַ֖ד נָשִׁ֥ים וָטָֽף : 39 וַיְשַׁלַּח֨ אֶת־הַֽהֲמוֹנִ֔ים וַיַּ֖עַל לָֽאֳנִיָּ֑ה וַיָּבֹ֖א אֶל־גְּבוּלֵ֥י מַגְדַּלָּֽה :

לפרק הבא








להפעלת המסגרות
load frameset