לפרק הקודם

הבשורה על־פי מתי
פרק יח

הגדול במלכות השמים

1 בַּשָּׁעָ֣ה הַהִ֔יא נִגְּשׁ֧וּ הַתַּלְמִידִ֛ים אֶל־יֵשׁ֖וּעַ וַיֹּאמֵ֑רוּ מִ֣י אֵפ֥וֹא ה֛וּא הַגָּד֖וֹל בְּמַלְכ֥וּת הַשָּׁמָֽיִם : 2 וַיִּקְרָ֥א יֵשׁ֖וּעַ אֶל־יֶ֣לֶד קָטָ֑ן וַיַּֽעֲמִידֵ֖הוּ בְּתוֹכָֽם : 3 וַיֹּאמַ֑ר אָמְנָ֞ם אֲנִ֣י ׀ אֹמֵ֣ר לָכֶ֗ם אִם־לֹ֤א תָּשׁ֨וּבוּ֨ וְתִהְיוּ֨ כִּֽילָדִ֣ים קְטַנִּ֔ים לֹ֥א תָבֹ֖אוּ אֶל־מַלְכ֥וּת הַשָּׁמָֽיִם : 4 לָכֵ֗ן מִ֞י אֲשֶׁ֨ר יַשְׁפִּ֤יל אֶת־נַפְשׁוֹ֨ כַּיֶּ֣לֶד הַזֶּ֔ה ה֥וּא הַגָּד֖וֹל בְּמַלְכ֥וּת הַשָּׁמָֽיִם : 5 וּמִי֩ אֲשֶׁ֨ר יְקַבֵּ֜ל יֶ֣לֶד אֶחָ֤ד כָּזֶה֨ בִּשְׁמִ֔י אֹתִ֖י ה֥וּא מְקַבֵּֽל :

מכשילים ומכשולים

6 וְכֹל֩ אֲשֶׁ֨ר יַכְשִׁ֜יל אֶת־אַחַ֧ד הַקְּטַנִּ֛ים הָאֵ֖לֶּה הַמַּֽאֲמִינִ֣ים בִּ֑י יוֹעִ֣יל ל֔וֹ כִּ֣י יִתָּלֶ֗ה פֶּ֤לַח הָרֵחַ֨יִם֨ עַל־צַוָּארָ֔יו וִֽיטֻבַּ֖ע בִּמְצוּלַ֥ת הַיָּֽם : 7 א֣וֹי לַתֵּבֵל֘ מִפְּנֵ֣י הַמִּכְשֹׁלִים֒ כִּ֚י צָרִ֣יךְ ה֔וּא אֲשֶׁ֥ר יָב֖וֹאוּ הַמִּכְשֹׁלִ֑ים אֶ֗פֶס א֚וֹי לָאִ֣ישׁ הַה֔וּא אֲשֶׁ֥ר הַמִּכְשׁ֖וֹל בָּ֥א עַל־יָדֽוֹ : 8 לָ֠כֵן אִם־תַּכְשִֽׁילְךָ֤ יָֽדְךָ֨ א֣וֹ רַגְלְךָ֔ קַצֵּ֥ץ אֹתָ֖ן וְהַשְׁלֵ֣ךְ מִמֶּ֑ךָּ ט֣וֹב לְךָ֞ לָב֨וֹא אֶל־הַֽחַיִּי֤ם פִּסֵּ֨חַ֨ א֣וֹ בַֽעַל־מ֔וּם מֵהְי֣וֹת לְךָ֗ שְׁתֵּ֤י יָדַ֨יִם֨ א֣וֹ שְׁתֵּ֣י רַגְלַ֔יִם וּלְהָשְׁלַ֖ךְ אֶל־אֵ֥שׁ עוֹלָֽם : 9 וְאִם־עֵֽינְךָ֨ תַּכְשִֽׁילְךָ֔ נַתֵּ֥ק אֹתָ֖הּ וְהַשְׁלֵ֣ךְ מִמֶּ֑ךָּ ט֣וֹב לְךָ֗ לָב֤וֹא אֶל־הַֽחַיִּים֨ בְּעַ֣יִן אַחַ֔ת מִהְי֤וֹת לְךָ֨ שְׁתֵּ֣י עֵינַ֔יִם וּלְהָשְׁלַ֖ךְ אֶל־אֵ֥שׁ גֵּֽיהִנֹּֽם :

משל השה האובד

10 רְאוּ֨ אַל־תִּבְז֔וּ אֶת־אַחַ֖ד הַקְּטַנִּ֣ים הָאֵ֑לֶּה כִּ֞י אֲנִ֣י ׀ אֹמֵ֣ר לָכֶ֗ם כִּ֣י מַלְאֲכֵיהֶ֤ם בַּשָּׁמַ֨יִם֨ רֹאִ֣ים תָּמִ֔יד אֶת־פְּנֵ֥י אָבִ֖י אֲשֶׁ֥ר בַּשָּׁמָֽיִם : 11 כִּ֚י בָּ֣א בֶן־הָֽאָדָ֔ם לְהוֹשִׁ֖יעַ אֶת־הָֽאוֹבֵֽד : 12 מַה־תַּחְשְׁב֗וּ אִם־תִּהְיֶ֤ינָה לְאִישׁ֨ מֵ֣אָה צֹ֔אן וְתִתְעֶ֖ה אַחַ֣ת מֵהֵ֑ן הַֽאִם־לֹ֤א יִטֹּשׁ֨ אֶת־הַתִּשְׁעִ֣ים וָתֵ֔שַׁע וְיֵלֵךְ֨ עַל־הֶֽהָרִ֔ים וִֽיבַקֵּ֖שׁ אֶת־הַתּוֹעָֽה : 13 וְאִ֣ם יִהְיֶ֔ה כִּ֥י יִמְצָ֖א אֹתָ֑הּ אָמְנָ֗ם אֲנִי֨ אֹמֵ֣ר לָכֶ֔ם כִּֽי־יִשְׂמַ֨ח עָלֶי֤הָ יוֹתֵר֨ מֵעַל֨ הַתִּשְׁעִ֣ים וָתֵ֔שַׁע אֲשֶׁ֖ר לֹ֥א תָעֽוּ : 14 כָּ֕כָה אֵ֣ין רָצ֔וֹן לִפְנֵ֥י אֲבִיכֶ֖ם אֲשֶׁ֣ר בַּשָּׁמָ֑יִם כִּ֣י יֹאבַ֔ד אַחַ֖ד הַקְּטַנִּ֥ים הָאֵֽלֶּה :

היחס אל אח חוטא

15 וְאִם־יֶֽחֱטָא֨ לְךָ֜ אָחִ֗יךָ לֵ֚ךְ וְהֽוֹכִיחֵ֔הוּ בֵּֽינְךָ֥ וּבֵינ֖וֹ לְבָ֑ד אִם־יִשְׁמַ֣ע אֵלֶ֔יךָ קָנִ֖יתָ אֶת־אָחִֽיךָ : 16 וְאִם֨ לֹ֣א יִשְׁמַ֔ע קַ֣ח אִתְּךָ֥ אֶחָד֖ א֣וֹ שְׁנָ֑יִם לְמַ֗עַן עַל־פִּ֨י שְׁנַ֧יִם אֽוֹ־שְׁלֹשָׁ֛ה עֵדִ֖ים יָ֥קוּם כָּל־דָּבָֽר : 17 וְאִ֤ם יְמָאֵן֨ לִשְׁמֹ֣עַ אֲלֵיהֶ֔ם דַּבֵּ֖ר אֶל־הַקְּהִלָּ֑ה וְאִ֤ם יְמָאֵן֨ לִשְׁמֹ֣עַ אֶל־הַקְּהִלָּ֔ה אָ֕ז יִהְיֶ֥ה לְךָ֛ כְּבֶן־נֵכָ֖ר וּכְמוֹכֵֽס : 18 אָמְנָ֗ם אֲנִי֘ אֹמֵ֣ר לָכֶם֒ כֹּ֣ל אֲשֶׁ֤ר תַּֽאַסְרוּ֨ עַל־הָאָ֔רֶץ אָס֥וּר יִהְיֶ֖ה בַּשָּׁמָ֑יִם וְכֹ֨ל אֲשֶׁ֤ר תַּתִּ֨ירוּ֨ עַל־הָאָ֔רֶץ מֻתָּ֥ר יִהְיֶ֖ה בַּשָּׁמָֽיִם : 19 וְע֛וֹד אֲנִ֥י אֹמֵ֖ר לָכֶ֑ם אִם־יִתְאַֽחֲדוּ֩ שְׁנַ֨יִם מִכֶּ֜ם עַל־הָאָ֗רֶץ בְּכָל־דָּבָר֨ אֲשֶׁ֣ר יִשְׁאֲל֔וּ יִהְיֶ֥ה לָהֶ֛ם מֵאֵ֥ת אָבִ֖י אֲשֶׁ֥ר בַּשָּׁמָֽיִם : 20 כִּ֗י בְּכָל־מָק֞וֹם אֲשֶׁר֩ יִקָּֽהֲל֨וּ שְׁנַ֤יִם אֽוֹ־שְׁלֹשָׁה֨ בִּשְׁמִ֔י שָׁ֖ם אֲנִ֥י בְתוֹכָֽם :

משל על עבד שלא רצה למחול

21 אָ֣ז נִגַּ֥שׁ אֵלָי֛ו פֶּטְר֖וֹס וַיֹּאמַ֑ר אֲדֹנָ֗י כַּמָּ֨ה פְעָמִ֜ים יֶֽחֱטָ֨א לִ֤י אָחִי֨ וְאֶסְלַ֣ח ל֔וֹ הַאִ֖ם עַד־שֶׁ֥בַע פְּעָמִֽים : 22 וַיֹּ֥אמֶר אֵלָ֖יו יֵשׁ֑וּעַ אֵין֩ אֲנִ֨י אֹמֵ֤ר לְךָ֨ עַד־שֶׁ֣בַע פְּעָמִ֔ים כִּ֛י אִם־עַד־שִׁבְעִ֥ים פְּעָמִ֖ים שֶֽׁבַע : 23 לָכֵ֗ן נִדְמְתָ֞ה מַלְכ֤וּת הַשָּׁמַ֨יִם֨ לְאִ֣ישׁ מֶּ֔לֶךְ אֲשֶׁ֣ר רָצָ֔ה לַקַ֥חַת חֶשְׁבּ֖וֹן מֵאֵ֥ת עֲבָדָֽיו : 24 וְכַֽאֲשֶׁ֖ר הֵחֵ֣ל לְחַשֵּׁ֑ב וַיּוּבָ֨א אֵלָ֜יו אֶחָ֗ד אֲשֶׁר֨ חִיֵּ֣ב ל֔וֹ עֲשֶׂ֥רֶת אֲלָפִ֖ים כִּכָּרִֽים : 25 וְכַאֲשֶׁ֞ר לֹֽא־הָיָ֣ה לוֹ֘ לְשַׁלֵּם֒ וַיִצַ֣ו אֲדֹנָ֗יו כִּֽי־יִמָּכֵ֨ר ה֧וּא וְאִשְׁתּ֛וֹ וּבָנָי֖ו וְכָל־אֲשֶׁ֣ר ל֑וֹ וִישֻׁלַּ֖ם לֽוֹ : 26 וַיּתְנַפֵּ֥ל הָעֶ֛בֶד וַיּשְׁתַּ֥חוּ ל֖וֹ לֵאמֹ֑ר אֲדֹנִ֗י הַֽאֲרֵ֥ךְ אַף֨ עָלַ֔י וְאֶת־הַכֹּ֖ל אֲשַׁלֵּ֥ם לָֽךְ : 27 וַיִּכָּ֨מְר֜וּ רַֽחֲמֵ֥י אֲד֛וֹן הָעֶ֥בֶד הַה֖וּא וַיִּתִּירֵ֑הוּ וַיִּטֹּ֥שׁ ל֖וֹ אֶת־הַחֽוֹב : 28 וַיֵּצֵא֘ הָעֶ֣בֶד הַהוּא֒ וַיִּמְצָ֞א אֶחָ֤ד מִן־הָֽעֲבָדִים֨ חֲבֵרָ֔יו אֲשֶׁ֛ר חִיֵּ֥ב ל֖וֹ מֵאָ֣ה דִֽינָרִ֑ים וַיִּתְפֹּ֨שׂ בּ֤וֹ וַיִחַנִּקֵ֨הוּ֨ לֵאמֹ֔ר שַׁלֵּ֣ם לִ֔י אֵ֛ת אֲשֶׁ֥ר אַתָּ֖ה חַיָּֽב : 29 וַיִּפֹּ֨ל הָעֶ֤בֶד חֲבֵרוֹ֨ לְרַגְלָ֔יו וַיּתְחַנֵּ֥ן ל֖וֹ לֵאמֹ֑ר הַֽאֲרֵ֥ךְ אַף֨ עָלַ֔י וְאֶת־הַכֹּ֖ל אֲשַׁלֵּ֥ם לָֽךְ : 30 וְה֖וּא לֹ֣א רָצָ֑ה כִּ֤י אִם־הָלַךְ֨ וַיַּשְׁלִיכֵ֣הוּ אֶל־הַמִּשְׁמָ֔ר עַ֥ד כִּֽי־יְשַׁלֵּ֖ם אֶת־הַחֽוֹב : 31 וְהָֽעֲבָדִ֣ים חֲבֵרָ֗יו בִּרְאוֹתָם֨ מָ֣ה הָֽיְתָ֔ה הִתְעַצְּב֖וּ מְאֹ֑ד וַיָּבֹ֨אוּ֨ וַיְסַפְּר֣וּ לַֽאֲדֹֽנֵיהֶ֔ם אֵ֖ת כָּל־אֲשֶׁ֥ר נִהְיָֽתָה : 32 אָ֗ז קָ֥רָא ל֛וֹ אֲדֹנָי֖ו וַיֹּ֣אמֶר אֵלָ֑יו הָעֶ֣בֶד הָֽרָשָׁ֗ע אֵ֣ת כָּל־הַח֤וֹב הַהוּא֨ נָטַ֣שְׁתִּי לְךָ֔ בַּֽאֲשֶׁ֖ר בִּקַּ֥שְׁתָּ מִמֶּֽנִּי : 33 הַֽאִם־לֹ֞א הָיָ֤ה רָאוּי֨ גַּ֣ם לְךָ֔ לְרַחֵ֖ם עַל־הָעֶ֣בֶד חֲבֵרְ֑ךָ כַּֽאֲשֶׁ֛ר גַּ֥ם אֲנִ֖י רִחַ֥מְתִּי עָלֶיֽךָ : 34 וַיִּקְצֹ֣ף אֲדֹנָ֔יו וַיַּסְגֵּ֥ר אֹת֖וֹ אֶל־הַמְיַסְּרִ֑ים עַ֚ד כִּ֣י יְשַׁלֵּ֔ם אֵ֖ת כָּל־הַמְּחֻיָּ֥ב לֽוֹ : 35 כָּ֗כָה גַּ֛ם אָבִ֥י אֲשֶׁר־בַּשָּׁמַ֖יִם יַֽעֲשֶׂ֣ה לָכֶ֑ם אִם־לֹ֨א תִסְלְח֧וּ מִלִּבּֽוֹתֵיכֶ֛ם כָּל־אִ֥ישׁ לְאָחִ֖יו אֶת־פִּשְׁעֵיהֶֽם :

לפרק הבא








להפעלת המסגרות
load frameset