1 וַיְהִ֕י כַּֽאֲשֶׁ֥ר כִּלָּ֛ה יֵשׁ֖וּעַ אֶת־הָֽאֲמָרִ֣ים הָאֵ֑לֶּה וַיִּסַּ֣ע מִן־הַגָּלִ֗יל וַיָּבֹ֛א אֶל־גְּבוּלֵ֥י יְהוּדָ֖ה לְעֵ֥בֶר הַיַּרְדֵּֽן ׃ 2 וַיֵּֽלְכ֥וּ אַֽחֲרָ֖יו הַמוֹנִ֣ים רַבִּ֑ים וַיִּרְפָּ֥א אֹתָ֖ם שָֽׁם ׃ 3 וַיִּגְּשׁ֥וּ אֵלָ֛יו הַפְּרוּשִׁ֖ים מְנַסִּ֣ים אֹת֑וֹ וַיֹּֽאמְר֣וּ אֵלָ֔יו הֲמֻתָּ֥ר לְאִ֛ישׁ לְשַׁלַּ֥ח אֶת־אִשְׁתּ֖וֹ עַ֥ל כָּל־סִבָּֽה ׃ 4 וַיַּ֖עַן וַיֹּ֣אמֶר אֲלֵיהֶ֑ם הַֽאִם־לֹ֣א קְרָאתֶ֗ם כִּ֚י הָֽעֹשֶׂ֣ה מֵֽרֵאשִׁ֔ית זָכָ֥ר וּנְקֵבָ֖ה עָשָׂ֥ה אֹתָֽם ׃ 5 וְאָמַ֗ר עַל־כֵּן֨ יַֽעֲזָב־אִ֔ישׁ אֶת־אָבִ֖יו וְאֶת־אִמּ֑וֹ וְדָבַ֣ק בְּאִשְׁתּ֔וֹ וְהָי֥וּ שְׁנֵיהֶ֖ם לְבָשָׂ֥ר אֶחָֽד ׃ 6 לָכֵ֗ן אֵינָ֥ם עוֹד֨ שְׁנַ֔יִם כִּ֖י אִם־בָּשָׂ֣ר אֶחָ֑ד לָכֵ֗ן אֵ֣ת אֲשֶׁ֤ר חִבֵּר֨ הָֽאֱלֹהִ֔ים אַל־יַפְרִ֖יד אָדָֽם ׃ 7 וַיֹּֽאמְר֖וּ אֵלָ֑יו לָמָּ֤ה אֵפוֹא֨ צִוָּ֣ה מֹשֶׁ֔ה לָתֵ֛ת סֵ֥פֶר כְּרִית֖וּת וּלְשַׁלְּחָֽהּ ׃ 8 וַיֹּאמֶר֘ אֲלֵיהֶם֒ כִּ֣י מֹשֶׁ֗ה בַּֽעֲבוּר֨ קְשִׁ֣י לְבַבְכֶ֔ם הִנִּ֥יחַ לָכֶ֖ם לְשַׁלַּ֣ח אֶת־נְשֵׁיכֶ֑ם אַ֥ךְ מֵֽרֵאשִׁ֖ית לֹא־הָ֥יָה כֵֽן ׃ 9 וַֽאֲנִי֨ אֹמֵ֣ר לָכֶ֔ם כִּ֣י כָל־אִ֗ישׁ אֲשֶׁ֨ר יְשַׁלַּ֤ח אֶת־אִשְׁתּוֹ֨ בִּלְתִּ֨י עַל־דְּבַ֥ר זְנ֛וּת וְיִשָּׂ֥א אַחֶ֖רֶת מְנָאֵ֣ף ה֑וּא וְהַנֹּשֵׂ֥א גְרוּשָׁ֖ה מְנָאֵ֥ף הֽוּא ׃ 10 וַיֹּֽאמְר֥וּ אֵלָ֖יו תַּלְמִידָ֑יו אִם־כֵּ֨ן ה֜וּא דְּבַ֤ר הָאִישׁ֨ עִ֣ם הָֽאִשָּׁ֔ה לֹ֥א יוֹעִ֖יל לְהִתְאַחֵ֥ד בְּנִשּׂוּאִֽים ׃ 11 וַיֹּ֖אמֶר אֲלֵיהֶ֑ם לֹ֣א הַכֹּ֗ל יָכִ֨ילוּ֨ אֶת־הַדָּבָ֣ר הַזֶּ֔ה כִּ֚י אִם־אֵ֔לֶּה אֲשֶׁ֖ר נִתַּ֥ן לָהֶֽם ׃ 12 כִּי֩ יֵ֨שׁ סָֽרִיסִ֜ים אֲשֶׁ֨ר מִבֶּ֣טֶן הָאֵם֘ יֻלְּד֣וּ כֵן֒ וְיֵ֨שׁ סָֽרִיסִ֜ים אֲשֶׁ֤ר סֹֽרְסוּ֨ בִּידֵ֣י הָֽאֲנָשִׁ֔ים וְיֵ֣שׁ סָֽרִיסִ֗ים אֲשֶׁר֨ סֵֽרְס֣וּ אֶת־עַצְמָ֔ם לְמַ֖עַן מַלְכ֣וּת הַשָּׁמָ֑יִם מִ֗י אֲשֶׁ֥ר יוּכַ֛ל לְהָכִ֖יל יָכִֽיל ׃
13 אָ֣ז הֽוּבְא֤וּ אֵלָיו֨ יְלָדִ֣ים קְטַנִּ֔ים לְמַ֗עַן יָשִׂ֧ים אֶת־יָדָ֛יו עֲלֵיהֶ֖ם וְיִתְפַּלֵּ֑ל וְהַתַּלְמִידִ֖ים גָּ֥עֲרוּ בָֽם ׃ 14 וַיֹּ֣אמֶר יֵשׁ֗וּעַ הַנִּ֨יחוּ֨ לַיְלָדִ֔ים וְאַל־תִּמְנְע֥וּ אֹתָ֖ם מִבּ֣וֹא אֵלָ֑י כִּ֛י מִן־כָּאֵ֖לֶּה מַלְכ֥וּת הַשָּׁמָֽיִם ׃ 15 וַיָּ֥שֶׂם אֶת־יָדָ֖יו עֲלֵיהֶ֑ם וַיֵּ֖לֶךְ מִשָּֽׁם ׃
16 וְהִנֵּ֨ה אִ֥ישׁ אֶחָ֛ד נִגַּ֖שׁ וַיֹּ֣אמֶר אֵלָ֑יו הַמּוֹרֶ֣ה הַטּ֗וֹב מָ֣ה דָבָ֥ר טוֹב֨ אֶֽעֱשֶׂ֔ה לְמַ֛עַן יִהְי֥וּ לִ֖י חַיֵּ֥י עֽוֹלָמִֽים ׃ 17 וַיֹּ֣אמֶר אֵלָ֗יו לָ֣מָּה תִקְרָ֤א אֹתִי֨ ט֔וֹב אֵ֥ין ט֛וֹב בִּלְתִּ֥י אֶחָ֖ד הָֽאֱלֹהִ֑ים וְאִ֤ם תַּחְפֹּץ֨ לָב֣וֹא אֶל־הַֽחַיִּ֔ים שְׁמ֖וֹר אֶת־הַמִּצְוֹֽת ׃ 18 וַיֹּ֥אמֶר אֵלָ֖יו מָֽה הֵ֑ן וַיֹּ֤אמֶר יֵשׁ֨וּעַ֨ אֵ֣לֶּה הֵ֔ן לֹ֣א תִרְצַ֗ח לֹ֤א תִנְאַף֨ לֹ֣א תִגְנֹ֔ב לֹ֥א תַֽעֲנֶ֖ה עֵ֥ד שָֽׁקֶר ׃ 19 כַּבֵּ֥ד אֶת־אָבִ֖יךָ וְאֶת־אִמֶּ֑ךָ וְע֕וֹד וְאָֽהַבְתָּ֥ לְרֵֽעֲךָ֖ כָּמֽוֹךָ ׃ 20 וַיֹּ֤אמֶר אֵלָיו֨ הָעֶ֔לֶם אֶת־כָּל־אֵ֖לֶּה שָׁמַ֣רְתִּי מִנְּעוּרָ֑י מָ֥ה ע֖וֹד אֲנִ֥י חָסֵֽר ׃ 21 וַיֹּ֣אמֶר אֵלָיו֘ יֵשׁוּעַ֒ אִם־תַּחְפֹּ֞ץ לִהְי֣וֹת תָּמִ֗ים לֵ֣ךְ מְכֹ֤ר אֶת־קִנְיָנֶ֨יךָ֨ וְתֵ֣ן לָֽעֲנִיִּ֔ים וְיִהְיֶ֥ה לְךָ֛ אוֹצָ֖ר בַּשָּׁמָ֑יִם וּבֹ֖א לֵ֥ךְ אַֽחֲרָֽי ׃ 22 וְכִשְׁמ֤וֹעַ הָעֶ֨לֶם֨ אֶת־הַדָּבָ֔ר וַיֵּ֥לֶךְ ל֖וֹ מִתְעַצֵּ֑ב כִּ֛י הָי֥וּ ל֖וֹ קִנְיָנִ֥ים רַבִּֽים ׃ 23 וַיֹּ֥אמֶר יֵשׁ֖וּעַ אֶל־תַּלְמִידָ֑יו אָמְנָ֗ם אֲנִי֨ אֹמֵ֣ר לָכֶ֔ם כִּ֚י קָשֶׁ֣ה ה֔וּא אֲשֶׁ֥ר עָשִׁ֛יר יָב֖וֹא אֶל־מַלְכ֥וּת הַשָּׁמָֽיִם ׃ 24 וְע֛וֹד אֲנִ֥י אֹמֵ֖ר לָכֶ֑ם נָקֵ֞ל כִּ֣י יַֽעֲבֹ֤ר גָּמָל֨ בְּעַד֨ ח֣וּר הַמַּ֔חַט מֵֽאֲשֶׁ֥ר יָב֛וֹא עָשִׁ֖יר אֶל־מַלְכ֥וּת הָֽאֱלֹהִֽים ׃ 25 וְכַֽאֲשֶׁ֤ר שָֽׁמְעוּ֨ תַּלְמִידָ֔יו וַיִּשְׁתּֽוֹמְמ֥וּ מְאֹ֖ד לֵאמֹ֑ר מִ֥י אֵפ֖וֹא יוּכַ֥ל לְהִוָּשֵֽׁעַ ׃ 26 וַיַּבֵּ֥ט יֵשׁ֖וּעַ וַיֹּ֣אמֶר אֲלֵיהֶ֑ם מִבְּנֵֽי־אָדָם֨ נִמְנָ֣ע זֶ֔ה אַ֚ךְ הָֽאֱלֹהִ֔ים כָּל־הַדְּבָרִ֖ים בִּֽיכָלְתּֽוֹ ׃ 27 וַיַּ֥עַן פֶּטְר֖וֹס וַיֹּ֣אמֶר אֵלָ֑יו הִנֵּ֨ה אֲנַ֜חְנוּ עָזַ֤בְנוּ אֶת־הַכֹּל֨ וְהָלַ֣כְנוּ אַֽחֲרֶ֔יךָ מָ֥ה אֵפ֖וֹא יִהְיֶ֥ה לָֽנוּ ׃ 28 וַיֹּ֤אמֶר יֵשׁ֨וּעַ֨ אֲלֵיהֶ֔ם אָמְנָ֕ם אֲנִ֖י אֹמֵ֣ר לָכֶ֑ם כִּ֣י אַתֶּ֞ם אֲשֶׁ֣ר ׀ הֲלַכְתֶּ֣ם אַֽחֲרַ֗י בַּבְּרִיאָ֣ה הַֽחֲדָשָׁ֡ה כַּֽאֲשֶׁר֩ יֵשֵׁ֨ב בֶּן־הָֽאָדָ֜ם עַל־כִּסֵּ֣א כְבוֹד֗וֹ גַּם־אַתֶּ֨ם תֵּֽשְׁב֜וּ עַל־שְׁנֵ֤ים עָשָׂר֨ כִּסְא֔וֹת שֹׁ֣פְטִ֔ים אֶת־שְׁנֵ֥ים עָשָׂ֖ר שִׁבְטֵ֥י יִשְׂרָאֵֽל ׃ 29 וְכָל־אִ֞ישׁ אֲשֶׁ֨ר עָזַ֤ב בָּתִים֨ אֽוֹ־אַחִ֤ים אֽוֹ־אֲחָיוֹת֨ אוֹ־אָ֣ב אוֹ־אֵ֔ם אֽוֹ־אִשָּׁ֧ה אֽוֹ־בָנִ֛ים א֥וֹ שָׂד֖וֹת לְמַ֣עַן שְׁמִ֑י יִקַּח֨ מֵאָ֣ה שְׁעָרִ֔ים וְחַיֵּ֥י עֽוֹלָמִ֖ים יִירָֽשׁ ׃ 30 אַ֚ךְ רַבִּ֣ים רִֽאשׁוֹנִ֔ים יִהְ֖יוּ אַֽחֲרוֹנִ֑ים וְאַֽחֲרוֹנִ֖ים רִֽאשׁוֹנִֽים ׃
לפרק הבא