הבשורה על־פי מתי
פרק כב

משל על מלך שערך חתונה

1 וַיַּ֨עַן יֵשׁ֜וּעַ וַיְדַבֵּ֨ר ע֧וֹד אֲלֵיהֶ֛ם בִּמְשָׁלִ֖ים לֵאמֹֽר ׃ 2 נִדְמְתָה֨ מַלְכ֣וּת הַשָּׁמַ֔יִם לְמֶ֣לֶךְ אֶחָ֔ד אֲשֶׁ֛ר עָשָׂ֥ה חֲתֻנָּ֖ה לִבְנֽוֹ ׃ 3 וַיְשַׁלַּח֨ אֶת־עֲבָדָ֔יו לִקְרֹ֥א אֶת־הַקְּרוּאִ֖ים אֶל־הַֽחֲתֻנָּ֑ה וְלֹ֥א אָב֖וּ לָבֽוֹא ׃ 4 וַיִּשְׁלַ֥ח ע֛וֹד עֲבָדִ֥ים אֲחֵרִ֖ים לֵאמֹ֑ר אִמְרוּ֨ אֶל־הַקְּרוּאִ֔ים הִנֵּ֣ה ׀ הֲכִינֹ֣תִי אֶת־מִשְׁתִּ֗י בְּקָרַ֨י וּמְרִיאַ֤י טְבוּחִים֨ וְהַכֹּ֣ל מוּכָ֔ן בֹּ֖אוּ אֶל־הַֽחֲתֻנָּֽה ׃ 5 וְהֵם֨ לֹא־שָׂ֣מוּ לִבָּ֔ם וַיֵּֽלְכ֖וּ לָהֶ֑ם זֶ֥ה אֶל־שָׂדֵ֖הוּ וְזֶ֥ה אֶל־מִסְחָרֽוֹ ׃ 6 וְהַנִּשְׁאָרִ֖ים תָּֽפְשׂ֣וּ בַֽעֲבָדָ֑יו וַיְחָֽרְפ֖וּ וַיַּֽהַרְגֽוּם ׃ 7 וּבִשְׁמֹ֥עַ הַמֶּ֖לֶךְ וַיִּקְצֹ֑ף וַיִּשְׁלַ֣ח אֶת־צְבָאָ֗יו וַיְאַבֵּד֨ אֶת־הַמְּרַצְּחִ֣ים הָהֵ֔ם וְאֶת־עִירָ֖ם הִצִּֽית ׃ 8 אָ֖ז אָמַ֣ר אֶל־עֲבָדָ֑יו אָכֵ֗ן הַֽחֲתֻנָּה֨ מוּכָ֣נָה הִ֔יא אַ֣ךְ הַקְּרוּאִ֔ים לֹ֥א הָי֖וּ שֹׁוִֽים ׃ 9 לָכֵ֕ן לְכ֖וּ אֶל־מִפְלַגּ֣וֹת הַדְּרָכִ֑ים וְכֹל֨ אֲשֶׁ֣ר תִּמְצְא֔וּ קִרְא֖וּ אֶל־הַֽחֲתֻנָּֽה ׃ 10 וַיֵּֽצְאוּ֩ הָֽעֲבָדִ֨ים הָהֵ֜ם אֶל־הַדְּרָכִ֗ים וַיַּֽאַסְפ֤וּ אֶת־הַכֹּל֨ כָּל־אֲשֶׁ֣ר מָֽצְא֗וּ גַּ֥ם רָעִ֖ים גַּ֣ם טוֹבִ֑ים וַיִּמָּלֵ֥א בֵֽית־הַֽחֲתֻנָּ֖ה מְסִבִּֽים ׃ 11 וּבְב֣וֹא הַמֶּ֔לֶךְ לִרְא֖וֹת אֶת־הַמְּסִבִּ֑ים וַיַּ֤רְא שָׁם֨ אִ֔ישׁ אֲשֶׁ֛ר אֵינֶ֥נּוּ לָב֖וּשׁ בִּלְב֥וּשׁ הַֽחֲתֻנָּֽה ׃ 12 וַיֹּ֣אמֶר אֵלָ֔יו רֵעִ֗י אֵ֚יךְ בָּ֣אתָ הֵ֔נָּה בִּבְלִ֛י הֱי֥וֹת לְךָ֖ לְב֣וּשׁ הַֽחֲתֻנָּ֑ה וַיֵּֽאָלֵֽם ׃ 13 אָז֩ אָמַ֨ר הַמֶּ֜לֶךְ אֶל־הַמְּשָֽׁרְתִ֗ים אִסְרוּ֨ יָדָ֣יו וְרַגְלָ֔יו וְשָׂא֕וּהוּ וְהַשְׁלִיכ֖וּהוּ אֶל־הַחֹ֣שֶׁךְ הַֽחִיצ֑וֹן שָׁ֥ם יִהְיֶ֛ה בְּכִ֖י וַֽחֲרִיקַ֥ת שִׁנָּֽיִם ׃ 14 כִּ֕י רַבִּ֖ים הֵ֣ם קְרוּאִ֑ים וּמְעַטִּ֖ים נִבְחָרִֽים ׃

שאלות בעניין מס לקיסר ותחיית המתים

15 אָ֖ז הָֽלְכ֣וּ הַפְּרוּשִׁ֑ים וַיַּֽעֲשׂ֣וּ עֵצָ֔ה אֵ֥יךְ יְנַקְּשׁ֖וּהוּ בָּאֹֽמֶר ׃ 16 וַיִּשְׁלְח֨וּ אֵלָ֧יו אֶת־תַּלְמִֽידֵיהֶ֛ם עִם־הַדְּבֵקִ֥ים בְּהֽוֹרוֹד֖וֹס לֵאמֹ֑ר מוֹרֶ֗ה יָדַ֜עְנוּ כִּ֧י אִֽישׁ־אֱמֶ֣ת אַתָּ֗ה אֶת־דֶּ֤רֶךְ הָֽאֱלֹהִים֨ בֶּֽאֱמֶ֣ת תּוֹרֶ֔ה וְלֹ֤א תִדְאַג֨ לְאִ֔ישׁ כִּ֛י לֹ֥א תַבִּ֖יט אֶל־פְּנֵ֥י אֲנָשִֽׁים ׃ 17 לָכֵ֕ן אֱמֹ֥ר לָ֖נוּ מַה־תַּֽחֲשֹׁ֑ב הֲמֻתָּ֗ר לָתֵ֥ת מַ֛ס לַקֵּיסָ֖ר אִם־לֹֽא ׃ 18 וּבְדַ֧עַת יֵשׁ֛וּעַ אֶת־רִשְׁעָתָ֖ם וַיֹּאמַ֑ר מָ֗ה אַתֶּ֛ם מְנַסִּ֥ים אֹתִ֖י חֲנֵפִֽים ׃ 19 הַרְא֖וּנִי אֶת־מַטְבֵּ֣עַ הַמָּ֑ס וַיָּבִ֥יאוּ אֵלָ֖יו דִּינָֽר ׃ 20 וַיֹּ֖אמֶר אֲלֵיהֶ֑ם לְמִ֛י הַצֶּ֥לֶם הַזֶּ֖ה וְהַמִּכְתָּֽב ׃ 21 וַיֹּֽאמְר֥וּ אֵלָ֖יו לַקֵּיסָ֑ר וַיֹּ֣אמֶר אֲלֵיהֶ֗ם לָכֵ֞ן שַׁלְּמ֤וּ לַקֵּיסָר֨ אֵ֣ת אֲשֶׁ֣ר לַקֵּיסָ֔ר וְלָֽאֱלֹהִ֔ים אֵ֖ת אֲשֶׁ֥ר לָֽאֱלֹהִֽים ׃ 22 וּכְשָׁמְעָ֖ם וַיִּתְמָ֑הוּ וַיַּֽעַזְב֣וּ אֹת֔וֹ וַיֵּֽלְכ֖וּ לָהֶֽם ׃ 23 בַּיּ֣וֹם הַה֗וּא נִגְּשׁ֤וּ אֵלָיו֨ צַדּוּקִ֔ים הָאֹ֣מְרִ֔ים כִּ֛י אֵ֖ין תְּקוּמַ֥ת הַמֵּתִֽים ׃ 24 וַיִּשְׁאֲל֥וּ אֹת֖וֹ לֵאמֹ֑ר מוֹרֶה֨ מֹשֶׁ֣ה אָמַ֔ר אִ֣ישׁ כִּֽי־יָמ֗וּת וּבָנִים֨ אֵ֣ין ל֔וֹ יְיַבֵּ֤ם אָחִיו֨ אֶת־אִשְׁתּ֗וֹ וְיָקִ֥ים זֶ֖רַע לְאָחִֽיו ׃ 25 וְהִנֵּ֕ה הָי֥וּ אִתָּ֖נוּ שִׁבְעָ֣ה אַחִ֑ים וְהָֽרִאשׁ֞וֹן נָשָׂ֤א אִשָּׁה֨ וַיָּ֔מָת וּבַֽאֲשֶׁר֨ אֵֽין־ל֣וֹ זֶ֔רַע עָזַ֥ב אֶת־אִשְׁתּ֖וֹ לְאָחִֽיו ׃ 26 וּכְמוֹ־כֵ֕ן גַּ֧ם הַשֵּׁנִ֛י וְהַשְּׁלִישִׁ֖י עַד־הַשְּׁבִיעִֽי ׃ 27 וּבָאַֽחֲרוֹנָה֨ אַֽחֲרֵ֣י כֻלָּ֔ם מֵ֖תָה גַּ֥ם הָֽאִשָּֽׁה ׃ 28 וְעַתָּה֨ בַּתְּקוּמָ֔ה אֵ֥שֶׁת מִ֛י מִן־הַשִּׁבְעָ֖ה תִּהְיֶ֑ה כִּ֥י הָֽיְתָ֖ה לְכֻלָּֽם ׃ 29 וַיַּ֥עַן יֵשׁ֖וּעַ וַיֹּ֣אמֶר אֲלֵיהֶ֑ם תֹּעִ֣ים אַתֶּ֗ם מִבְּלִ֤י דַעְתְּכֶם֨ אֶת־הַכְּתָבִ֔ים וְגַם־לֹ֖א אֶת־גְּבוּרַ֥ת הָֽאֱלֹהִֽים ׃ 30 כִּ֚י בַּתְּקוּמָ֔ה לֹ֣א יִשְּׂא֔וּ וְגַ֖ם לֹ֣א תִנָּשֶׂ֑אנָה כִּ֚י אִם־יִהְי֔וּ כְּמַלְאֲכֵ֥י הָֽאֱלֹהִ֖ים בַּשָּׁמָֽיִם ׃ 31 וְעַל־אֹדוֹת֨ תְּקוּמַ֣ת הַמֵּתִ֔ים הַֽאִם־לֹ֣א קְרָאתֶ֗ם אֵ֣ת הַנֶּֽאֱמָ֥ר לָכֶ֛ם בְּפִ֥י הָֽאֱלֹהִ֖ים לֵאמֹֽר ׃ 32 אָֽנֹכִ֕י אֱלֹהֵ֧י אַבְרָהָ֛ם וֵֽאלֹהֵ֥י יִצְחָ֖ק וֵֽאלֹהֵ֣י יַֽעֲקֹ֑ב וְהָֽאֱלֹהִ֗ים אֵינֶ֨נּוּ֨ אֱלֹהֵ֣י הַמֵּתִ֔ים כִּ֖י אִם־אֱלֹהֵ֥י הַֽחַיִּֽים ׃ 33 וְכִשְׁמ֨וֹעַ֨ הַֽהֲמוֹנִ֔ים וַיִּשְׁתּֽוֹמְמ֖וּ עַל־לִקְחֽוֹ ׃

המצוה הגדולה

34 וְהַפְּרוּשִׁים֨ כְּשָׁמְעָ֔ם כִּ֥י חָסַ֖ם אֶת־פִּ֣י הַצַּדּוּקִ֑ים וַיִּקָּֽהֲל֖וּ יַחְדָּֽיו ׃ 35 וַיִּשְׁאַ֨ל אֶחָ֤ד מֵהֶם֨ יוֹדֵ֣עַ תּוֹרָ֔ה מְנַסֶּ֥ה אֹת֖וֹ וְאֹמֵֽר ׃ 36 מוֹרֶ֕ה מַה־הִ֛יא הַמִּצְוָ֥ה הַגְּדוֹלָ֖ה בַּתּוֹרָֽה ׃ 37 וַיֹּ֥אמֶר אֵלָ֖יו יֵשׁ֑וּעַ וְאָֽהַבְתָּ֗ אֵ֚ת יְהוָֹ֣ה אֱלֹהֶ֔יךָ בְּכָל־לְבָֽבְךָ֥ וּבְכָל־נַפְשְׁךָ֖ וּבְכָל־תְּבֽוּנָתֶֽךָ ׃ 38 זֹ֣את הִ֔יא הַמִּצְוָ֥ה הָרִֽאשׁוֹנָ֖ה וְהַגְּדוֹלָֽה ׃ 39 וְהַשֵּׁנִ֖ית דֹּמָ֣ה לָ֑הּ וְאָֽהַבְתָּ֥ לְרֵֽעֲךָ֖ כָּמֽוֹךָ ׃ 40 בִּשְׁתֵּי֨ הַמִּצְוֹ֣ת הָאֵ֔לֶּה כָּל־הַתּוֹרָ֥ה וְהַנְּבִיאִ֖ים תְּלוּיִֽם ׃

ישוע שואל בעניין בן־דוד

41 וּבְהִקָּהֵ֣ל הַפְּרוּשִׁ֗ים שָׁאַ֨ל אֹתָ֤ם יֵשׁ֨וּעַ֨ לֵאמֹ֔ר (42) מַה־תַּחְשְׁב֥וּ עַל־הַמָּשִׁ֖יחַ בֶּן־מִ֣י ה֑וּא וַֽיֹּאמְר֥וּ אֵלָ֖יו בֶּן־דָּוִֽד ׃ 42 (43) וַיֹּ֖אמֶר אֲלֵיהֶ֑ם אֵ֣יךְ אֵפוֹא֩ קוֹרֵ֨א אֹת֥וֹ דָוִ֛ד בָּר֥וּחַ ׀ אָד֖וֹן לֵאמֹֽר ׃ 43 (44) נְאֻ֥ם יְהוָֹ֖ה לַֽאדֹנִ֑י שֵׁ֚ב לִֽימִינִ֔י עַד־אָשִׁ֥ית אֹֽיְבֶ֖יךָ הֲדֹ֥ם לְרַגְלֶֽיךָ ׃ 44 (45) וְעַתָּ֗ה אִם־דָּוִ֞ד קוֹרֵ֤א אֹתוֹ֨ אָד֔וֹן אֵ֥יךְ ה֖וּא בְּנֽוֹ ׃ 45 (46) וְלֹֽא־יָכֹ֥ל אִ֛ישׁ לַֽעֲנ֥וֹת אֹת֖וֹ דָּבָ֑ר וְ֠גַם לֹֽא־הִתְעָרֵ֥ב אִישׁ֨ מִן־הַיּ֣וֹם הַה֔וּא לִשְׁאֹ֥ל אֹת֖וֹ עֽוֹד ׃