הבשורה על־פי מתי
פרק כג

דברי תוכחה על הסופרים והפרושים

1 אָ֠ז דִּבֶּ֥ר יֵשׁ֛וּעַ אֶל־הַֽהֲמוֹנִ֖ים וְאֶל־תַּלְמִידָֽיו ׃ 2 לֵאמֹ֑ר עַל־כִּסֵּ֣א מֹשֶׁ֔ה יֹֽשְׁבִ֖ים הַסּֽוֹפְרִ֥ים וְהַפְּרוּשִֽׁים ׃ 3 לָכֵ֗ן כָּל־דְּבָרִ֞ים כֹּ֣ל אֲשֶׁר֩ יֹֽאמְר֨וּ לָכֶ֤ם לִשְׁמֹר֨ שִׁמְר֣וּ וַֽעֲשׂ֔וּ אַ֛ךְ כְּפִ֥י מַֽעֲשֵׂיהֶ֖ם אַל־תַּֽעֲשׂ֑וּ כִּ֛י הֵ֥מָּה אֹֽמְרִ֖ים וְאֵינָ֥ם עֹשִֽׂים ׃ 4 כִּ֣י ׀ הֵ֣ם אֹסְרִ֗ים סְבָלִ֤ים כְּבֵדִים֨ וְקָשִׁ֣ים לָשֵׂ֔את וְשָׂמִ֖ים עַל־שִׁכְמֵ֣י הָֽאֲנָשִׁ֑ים אַ֣ךְ הֵ֗ם בְּאֶצְבָּעָ֛ם אֵינָ֥ם רֹצִ֖ים לְהָנִ֥יעַ אֹתָֽם ׃ 5 וְכָל־מַֽעֲשֵׂיהֶם֨ הֵ֣מָּה עֹשִׂ֔ים לְמַ֥עַן הֵֽרָא֖וֹת אֶל־הָֽאֲנָשִׁ֑ים וְהֵ֤ם מַרְחִיבִים֨ אֶת־תְּפִֽילֵיהֶ֔ם וּמַגְדִּילִ֖ים אֶת־כַּנְפֵ֥י בִגְדֵיהֶֽם ׃ 6 וְאֹ֣הֲבִ֔ים אֶת־הַמְּסִבָּ֤ה הָֽעֶלְיוֹנָה֨ בַּסְּעוּד֔וֹת וְאֶת־הַמּֽוֹשָׁב֥וֹת הָרִֽאשֹׁנִ֖ים בְּבָתֵּ֥י הַכְּנֵֽסִיּֽוֹת ׃ 7 וּשְׁאֵל֥וֹת שָׁל֖וֹם בַּשְּׁוָקִ֑ים וּלְהִקָּרֵ֛א מֵאֵ֥ת הָֽאֲנָשִׁ֖ים רַבִּ֥י ׀ רַבִּֽי ׃ 8 אַ֣ךְ אַתֶּ֔ם לֹ֥א תִקָּֽרְא֖וּ רַבִּ֑י כִּ֞י אֶחָ֣ד מֽוֹרְכֶ֗ם ה֚וּא הַמָּשִׁ֔יחַ וְאַתֶּ֥ם כֻּלְּכֶ֖ם אַחִ֥ים אַתֶּֽם ׃ 9 וְאָ֛ב לֹֽא־תִקְרְא֥וּ לָכֶ֖ם עַל־הָאָ֑רֶץ כִּ֗י אֶחָד֨ ה֣וּא אֲבִיכֶ֔ם אֲשֶׁ֖ר בַּשָּמָֽיִם ׃ 10 וְגַ֛ם לֹ֥א תִקָּֽרְא֖וּ מוֹרִ֑ים כִּ֚י אֶחָ֣ד מֽוֹרְכֶ֔ם ה֖וּא הַמָּשִֽׁיחַ ׃ 11 אַ֚ךְ הַגָּד֣וֹל בָּכֶ֔ם יְהִ֖י מְשָֽׁרֶתְכֶֽם ׃ 12 וְכֹ֨ל אֲשֶׁ֧ר יְרוֹמֵ֛ם אֶת־נַפְשׁ֖וֹ יִשָּׁפֵ֑ל וְכֹ֨ל אֲשֶׁ֥ר יַשְׁפִּ֛יל אֶת־נַפְשׁ֖וֹ יְרוֹמָֽם ׃ 13 אַ֞ךְ א֣וֹי לָכֶ֗ם סֽוֹפְרִ֤ים וּפְרוּשִׁים֨ חֲנֵפִ֔ים כִּ֣י סֹֽגְרִ֥ים אַתֶּ֛ם אֶת־מַלְכ֥וּת הַשָּׁמַ֖יִם לִפְנֵ֣י הָֽאֲנָשִׁ֑ים כִּ֣י אַתֶּ֗ם אֵֽינְכֶם֨ בָּאִ֣ים בָּ֔הּ וְגַם֨ לַבָּאִ֣ים אֵלֶ֔יהָ לֹ֥א תַנִּ֖יחוּ לָב֥וֹא בָֽהּ ׃ 14 א֣וֹי לָכֶ֞ם סֽוֹפְרִ֣ים וּפְרוּשִׁים֘ חֲנֵפִים֒ כִּ֣י מְבַלְּעִ֤ים אַתֶּם֨ אֶת־בָּתֵּ֣י הָֽאַלְמָנ֔וֹת וּלְמַרְאֵ֥ה עַ֖יִן תַּֽאֲרִ֣יכוּ לְהִתְפַּלֵּ֑ל בַּֽעֲב֣וּר זֹ֔את תִּקְח֥וּ מִשְׁפָּ֖ט יֶ֥תֶר מְאֹֽד ׃ 15 א֣וֹי לָכֶ֞ם סֽוֹפְרִ֣ים וּפְרוּשִׁים֘ חֲנֵפִים֒ כִּ֣י תְסֽוֹבְב֤וּ אֶת־הַיָּם֨ וְאֶת־הַיַּבָּשָׁ֔ה לְיַחֵ֖ד אִ֣ישׁ אֶחָ֑ד וְכַֽאֲשֶׁר֨ נִהְיָ֣ה כֵ֔ן אַתֶּם֩ עֹשִׂ֨ים אֹת֧וֹ לְבֶן־גֵּֽיהִנֹּ֛ם כִּפְלַ֖יִם יוֹתֵ֥ר מִכֶּֽם ׃ 16 א֣וֹי לָכֶ֞ם מְנַֽהֲלִ֣ים עִוְרִ֗ים הָאֹ֨מְרִ֜ים מִ֣י אֲשֶׁ֤ר יִשָּׁבַע֨ בַּֽהֵיכָ֔ל אֵ֥ין זֶ֖ה מְא֑וּמָה אַ֕ךְ מִ֣י אֲשֶׁ֧ר יִשָּׁבַ֛ע בִּזְהַ֥ב הַֽהֵיכָ֖ל חַיָּ֥ב הֽוּא ׃ 17 סְכָלִ֖ים וְעִוְרִ֑ים מָ֚ה גָּד֣וֹל יֶ֔תֶר אִ֣ם הַזָּהָ֔ב א֥וֹ הַֽהֵיכָ֖ל הַמְּקַדֵּ֥שׁ אֶת־הַזָּהָֽב ׃ 18 וְע֗וֹד מִ֣י אֲשֶׁ֤ר יִשָּׁבַע֨ בַּמִּזְבֵּ֔חַ אֵ֥ין זֶ֖ה מְא֑וּמָה אַ֣ךְ מִי֩ אֲשֶׁ֨ר יִשָּׁבַ֧ע בַּקָּרְבָּ֛ן אֲשֶׁ֥ר עָלָ֖יו חַיָּ֥ב הֽוּא ׃ 19 סְכָלִ֖ים וְעִוְרִ֑ים מָ֚ה גָּד֣וֹל יֶ֔תֶר אִ֣ם הַקָּרְבָּ֔ן א֥וֹ הַמִּזְבֵּ֖חַ הַמְּקַדֵּ֥שׁ אֶת־הַקָּרְבָּֽן ׃ 20 לָכֵן֨ הַנִּשְׁבָּ֣ע בַּמִּזְבֵּ֔חַ נִשְׁבָּ֣ע בּ֔וֹ וּבְכָל־הַדְּבָרִ֖ים אֲשֶׁ֥ר עָלָֽיו ׃ 21 וְהַנִּשְׁבָּע֨ בַּֽהֵיכָ֔ל נִשְׁבָּ֥ע בּ֖וֹ וּבַשּׁוֹכֵ֥ן בְּתוֹכֽוֹ ׃ 22  וְהַנִּשְׁבָּ֖ע בַּשָּׁמַ֑יִם נִשְׁבָּע֨ בְּכִסֵּ֣א הָֽאֱלֹהִ֔ים וּבַיֹּשֵׁ֖ב עָלָֽיו ׃ 23 א֣וֹי לָכֶ֞ם סֽוֹפְרִ֣ים וּפְרוּשִׁים֘ חֲנֵפִים֒ כִּי֩ מְעַשְּׂרִ֨ים אַתֶּ֜ם אֶת־הַמִּנְתָּ֤ה וְאֶת־הַשָּׁבָת֨ וְאֶת־הַכַּמֹּ֔ן וַֽעֲזַבְתֶּ֗ם אֶת־הַדְּבָרִ֞ים הַכְּבֵדִ֥ים יֶ֨תֶר֨ בַּתּוֹרָ֔ה אֶת־הַמִּשְׁפָּ֥ט אֶת־הַחֶ֖סֶד וְאֶת־הָֽאֱמוּנָ֑ה אֶת־אֵ֗לֶּה הָיָ֤ה צָרִיךְ֨ לַֽעֲשׂ֔וֹת וְלֹ֥א לַֽעֲזֹ֖ב אֶת־אֵֽלֶּה ׃ 24 מְנַֽהֲלִ֣ים עִוְרִ֔ים הַמְּסַנְנִים֨ אֶת־הַיַּתּ֔וּשׁ וְהַבֹּֽלְעִ֖ים אֶת־הַגָּמָֽל ׃ 25 א֣וֹי לָכֶ֔ם סֽוֹפְרִ֥ים וּפְרוּשִׁ֖ים חֲנֵפִ֑ים כִּ֣י ׀ מְטַֽהֲרִ֣ים אַתֶּ֗ם אֵ֣ת אֲשֶׁ֤ר מִחוּץ֨ לַכּ֣וֹס וְלַזִּבּוּרִ֔ית וּבִפְנִ֕ים הֵ֥ן מְלֵא֖וֹת גְּזֵלָ֥ה וְחָמָֽס ׃ 26 פָּר֖וּשׁ עִוֵּ֑ר טַהֵ֣ר בָּרִֽאשׁוֹנָ֗ה אֶת־פְּנִים֨ הַכּ֣וֹס וְהַזִּבּוּרִ֔ית לְמַ֧עַן יִהְיֶ֛ה גַּ֥ם חִֽיצוֹנָ֖ן טָהֽוֹר ׃ 27 א֣וֹי לָכֶ֔ם סֽוֹפְרִ֥ים וּפְרוּשִׁ֖ים חֲנֵפִ֑ים כִּי֩ דֹמִ֨ים אַתֶּ֜ם לִקְבָרִ֣ים נְטוֹחִ֗ים הַנִּרְאִ֤ים נָאִים֨ מִח֔וּץ אַ֣ךְ בִּפְנִ֗ים הֵ֧ם מְלֵאִ֛ים עַצְמ֥וֹת מֵתִ֖ים וְכָל־טֻמְאָֽה ׃ 28 כֵּ֚ן גַּ֣ם אַתֶּ֔ם מִח֛וּץ תֵּֽרָא֥וּ צַדִּיקִ֖ים אֶל־הָֽאֲנָשִׁ֑ים אַ֣ךְ בִּפְנִ֔ים מְלֵאִ֥ים אַתֶּ֖ם חֹ֥נֶף וְעָֽוֹן ׃ 29 א֣וֹי לָכֶ֔ם סֽוֹפְרִ֥ים וּפְרוּשִׁ֖ים חֲנֵפִ֑ים כִּ֣י בוֹנִ֤ים אַתֶּם֨ אֶת־קִבְרֵ֣י הַנְּבִיאִ֔ים וְתַעְדּ֕וּ אֶת־בָּתֵּ֥י קִבְר֖וֹת הַצַּדִּיקִֽים ׃ 30 וְאֹֽמְרִ֖ים אַתֶּ֑ם אִ֤ם חָיִ֨ינוּ֨ בִּימֵ֣י אֲבוֹתֵ֔ינוּ לֹֽא־הָיִ֥ינוּ חַבְרֵיהֶ֖ם בְּדַ֥ם הַנְּבִיאִֽים ׃ 31 לָכֵ֗ן מְעִידִ֤ים אַתֶּם֨ עַל־עַצְמְכֶ֔ם כִּ֗י בְּנֵ֛י מְרַצְּחֵ֥י הַנְּבִיאִ֖ים אַתֶּֽם ׃ 32 גַּ֨ם־אַתֶּ֔ם מַלְּא֖וּ אֶת־מִדַּ֥ת אֲבֽוֹתֵיכֶֽם ׃ 33 נְחָשִׁ֖ים יְלִידֵ֣י צִפְעוֹנִ֑ים אֵיכָ֥ה תִמָּֽלְט֖וּ מִמִּשְׁפַּ֥ט גֵּיֽהִנֹּֽם ׃ 34 בַּֽעֲב֣וּר זֹא֗ת הִנֵּ֤ה אָֽנֹכִי֨ שֹׁלֵ֣חַ לָכֶ֔ם נְבִיאִ֥ים וַֽחֲכָמִ֖ים וְסֽוֹפְרִ֑ים וּמֵהֶ֞ם תָּמִ֣יתוּ וְתִצְלְב֗וּ וּמֵהֶם֨ תְּיַסְּר֤וּ בְשׁוֹטִים֨ בְּבָתֵּ֣י כְנֵסִיּֽוֹתֵיכֶ֔ם וְתִרְדְּפ֖וּ מֵעִ֥יר אֶל־עִֽיר ׃ 35 לְמַ֜עַן יָב֧וֹא עֲלֵיכֶ֛ם כָּל־דַּ֥ם הַצַּדִּיקִ֖ים הַנִּשְׁפָּ֣ךְ עַל־הָאָ֑רֶץ מִדַּ֞ם הֶ֣בֶל הַצַּדִּ֗יק עַ֣ד דַּ֤ם זְכַרְיָה֨ בֶּן־בֶּֽרֶכְיָ֔ה אֲשֶׁר֨ רְצַחְתֶּ֣ם אֹת֔וֹ בֵּ֥ין הַֽהֵיכָ֖ל וְהַמִּזְבֵּֽחַ ׃ 36 אָמְנָ֕ם אֲנִ֖י אֹמֵ֣ר לָכֶ֑ם כָּל־אֵ֥לֶּה יָבֹ֖אוּ עַל־הַדּ֥וֹר הַזֶּֽה ׃

קינה על ירושלים

37 יְרֽוּשָׁלַ֣םִ ׀ יְרֽוּשָׁלִַ֗ם הַֽהֹרֶ֨גֶת֨ אֶת־הַנְּבִיאִ֔ים וְהַסֹּקֶלֶת֘ אֶת־הַנִּשְׁלָחִ֣ים אֵלַיִךְ֒ כַּמָּ֞ה רָצִ֣יתִי ׀ לְקַבֵּ֣ץ אֶת־בָּנַ֗יִךְ כַּֽאֲשֶׁ֨ר תְּקַבֵּ֧ץ תַּרְנְגֹ֛לֶת אֶת־אֶפְרֹחֶ֖יהָ תַּ֣חַת כְּנָפֶ֑יהָ וְלֹ֖א אֲבִיתֶֽם ׃ 38 הִנֵּ֕ה בֵּֽיתְכֶ֛ם יִשָּׁאֵ֥ר לָכֶ֖ם שֹׁמֵֽם ׃ 39 כִּ֥י אֲנִ֖י אֹמֵ֣ר לָכֶ֑ם לֹ֤א תִרְא֨וּנִי֨ מֵֽעַתָּ֔ה עַ֚ד כִּ֣י תֹֽאמְר֔וּ בָּר֥וּךְ הַבָּ֖א בְּשֵׁ֥ם יְהוָֹֽה ׃