1 וּבְלֵיל֨ מוֹצָ֣א הַשַּׁבָּ֔ת כַּֽאֲשֶׁר֙ הֵחֵ֣ל לְהַגִּ֔יהַּ הַיּ֥וֹם הָֽרִאשׁ֖וֹן בַּשָּׁב֑וּעַ וַתָּבֹ֞א מִרְיָ֤ם הַמַּגְדַּלִּית֨ וּמִרְיָ֣ם הָֽאַחֶ֔רֶת לִרְא֖וֹת אֶת־הַקָּֽבֶר ׃ 2 וְהִנֵּ֛ה רַ֥עַשׁ גָּד֖וֹל הָיָ֑ה כִּי֩ מַלְאַ֨ךְ יְהֹוָ֜ה יָרַ֣ד מִן־הַשָּׁמַ֗יִם וַיִּגַּשׁ֨ וַיָּ֧גֶל אֶת־הָאֶ֛בֶן מִן־הַפֶּ֖תַח וַיֵּ֥שֶׁב עָלֶֽיהָ ׃ 3 וּמַרְאֵ֖הוּ הָיָ֣ה כְבָּרָ֑ק וּלְבוּשׁ֖וֹ לָבָ֥ן כַּשָֽׁלֶג ׃ 4 וּמִפַּחְדּ֖וֹ רָֽעֲשׁ֣וּ הַשֹּֽׁמְרִ֑ים וַיִּהְי֖וּ כְּמֵתִֽים ׃ 5 וַיַּ֤עַן הַמַּלְאָךְ֨ וַיֹּ֣אמֶר אֶל־הַנָּשִׁ֔ים אַל־תִּירֶ֖אנָה אַתֶּ֑ן כִּ֣י יָדַ֔עְתִּי כִּ֛י אֶת־יֵשׁ֥וּעַ הַנִּצְלָ֖ב אַתֶּ֥ן מְבַקְּשֽׁוֹת ׃ 6 אֵ֥ין הוּא֨ פֹּ֔ה כִּ֥י קָ֖ם כַּֽאֲשֶׁ֣ר אָמָ֑ר בֹּ֤אנָה וּרְאֶ֣ינָה אֶת־הַמָּק֔וֹם אֲשֶׁ֛ר שָׁ֥כַב שָׁ֖ם הָֽאָדֽוֹן ׃ 7 וְלֵ֨כְנָה מְהֵרָ֜ה וֶֽאֱמֹ֣רְנָה אֶל־תַּלְמִידָ֗יו כִּ֥י קָם֨ מֵעִ֣ם הַמֵּתִ֔ים וְהִנֵּ֣ה ה֗וּא הוֹלֵ֤ךְ לִפְנֵיכֶם֨ הַגָּלִ֔ילָה שָׁ֖ם תִּרְא֣וּ אֹת֑וֹ הִנֵּ֖ה אָמַ֥רְתִּי לָכֶֽן ׃ 8 וַתֵּצֶ֤אנָה מְהֵרָה֨ מִן־הַקֶּ֔בֶר בְּיִרְאָ֖ה וּבְשִׂמְחָ֣ה גְדוֹלָ֑ה וַתְּרוּצֶ֖ינָה לְהַגִּ֥יד אֶל־תַּלְמִידָֽיו ׃ 9 וְכַֽאֲשֶׁ֨ר הָֽלְכ֜וּ לְהַגִּ֣יד אֶל־תַּלְמִידָ֗יו וְהִנֵּ֤ה יֵשׁ֨וּעַ֨ פָּגַ֣שׁ אֹתָ֔ן וַיֹּ֖אמֶר שָׁל֣וֹם לָכֶ֑ן וְהֵ֤נָּה נִגְּשׁוּ֨ וַתַּֽחֲזֵ֣קְנָה בְרַגְלָ֔יו וַתִּשְׁתַּֽחֲוֶ֖יןָ לֽוֹ ׃ 10 וַיֹּ֧אמֶר אֲלֵיהֶ֛ן יֵשׁ֖וּעַ אַל־תִּירֶ֑אנָה לֵ֚כְנָה הַגֵּ֣דְנָה לְאַחַ֔י כִּ֤י יֵֽלְכוּ֨ הַגָּלִ֔ילָה וְשָׁ֖ם יִרְא֥וּ אֹתִֽי ׃ 11 וְכַֽאֲשֶׁ֣ר הָֽלְכ֔וּ הִנֵּ֛ה אֲחָדִ֥ים מִן־הַמִּשְׁמָ֖ר בָּ֣אוּ אֶל־הָעִ֑יר וַיַּגִּ֨ידוּ֨ אֶל־רָאשֵׁ֣י הַכֹּֽהֲנִ֔ים אֵ֖ת כָּל־הַנִּהְיֽוֹת ׃ 12 וַיִּקָּֽהֲל֥וּ עִם־הַזְּקֵנִ֖ים וַיַּֽעֲשׂ֣וּ עֵצָ֑ה וַיִּתְּנ֛וּ דֵּ֥י כֶ֖סֶף אֶל־אַנְשֵׁ֥י הַצָּבָֽא ׃ 13 וַיֹּאמֵ֑רוּ אִמְר֗וּ כִּ֣י תַלְמִידָ֥יו בָּ֨אוּ֨ לַ֔יְלָה וְגָֽנְב֥וּ אֹת֖וֹ בִּהְיוֹתֵ֥נוּ יְשֵׁנִֽים ׃ 14 וְאִ֨ם תִּשָּׁ֤מַע זֹאת֨ אֶל־הַפֶּחָ֔ה אֲנַ֖חְנוּ נְפַתֶּ֣ה אֹת֑וֹ וְאֶתְכֶ֖ם נַֽעֲשֶׂ֥ה בְטוּחִֽים ׃ 15 וַיִּקְּחוּ֨ אֶת־הַכֶּ֔סֶף וַיַּֽעֲשׂ֖וּ כַּֽאֲשֶׁ֣ר לֻמָּ֑דוּ וְהַדָּבָ֣ר הַזֶּ֗ה נִשְׁמָע֨ בֵּי֣ן הַיְּהוּדִ֔ים עַ֖ד הַיּ֥וֹם הַזֶּֽה ׃
16 וְאַחַ֨ד עָשָׂ֧ר הַתַּלְמִידִ֛ים נָֽסְע֖וּ הַגָּלִ֑ילָה אֶל־הָהָ֕ר אֲשֶׁ֛ר יָעַ֥ד לָהֶ֖ם יֵשֽׁוּעַ ׃ 17 וּבִרְאוֹתָם֨ אֹת֔וֹ וַיִּשְׁתַּֽחֲו֖וּ ל֑וֹ אַ֥ךְ אֲחָדִ֖ים סִפֵּֽקוּ ׃ 18 וַיִּגַּ֣שׁ יֵשׁ֔וּעַ וַיְדַבֵּ֥ר אֲלֵיהֶ֖ם לֵאמֹ֑ר נִתַּ֥ן לִי֨ כָּל־שָׁלְטָ֔ן בַּשָּׁמַ֖יִם וּבָאָֽרֶץ ׃ 19 לָכֵ֣ן לְכ֔וּ וַֽעֲשׂ֥וּ תַלְמִידִ֖ים אֵ֣ת כָּל־הַגּוֹיִ֑ם בְּטַבֵּ֣ל אֹתָ֔ם בְּשֵׁ֛ם הָאָ֥ב וְהַבֵּ֖ן וְר֥וּחַ הַקֹּֽדֶשׁ ׃ 20 וְלַמְד֣וּ אֹתָ֗ם לִשְׁמֹר֨ אֶת־כָּל־הַדְּבָרִ֔ים אֲשֶׁ֖ר צִוִּ֣יתִי אֶתְכֶ֑ם וְהִנֵּה֩ אָֽנֹכִ֨י אִתְּכֶ֧ם כָּל־הַיָּמִ֛ים עַד־תַּכְלִ֥ית הָֽעוֹלָ֖ם אָמֵֽן ׃
לבשורה על־פי מרקוס