לפרק הקודם

אגרת שאול אל טיטוס
פרק ג

התנהגות נאותה ומעשים טובים

1 הַזְכִּירֵ֗ם לְהִכָּנֵ֤עַ לְמֶמְשָׁלוֹת֨ וּלְשָׁלְטָנִ֔ים לִשְׁמ֖וֹעַ אֶל־הַמִּשְׂרָ֑ה לִהְי֥וֹת נְכוֹנִ֖ים לְכָל־מַֽעֲשֶׂ֥ה טֽוֹב ׃ 2 לֹ֥א לְחָרֵ֖ף אִ֑ישׁ לִהְי֤וֹת בִּלְתִּֽי־מַצִּים֨ סַלָּחִ֔ים וּמַרְאִ֥ים כָּל־עֲנָוָ֖ה אֶל־כָּל־בְּנֵ֥י אָדָֽם ׃ 3 כִּי֩ הָיִ֨ינוּ גַם־אֲנַ֜חְנוּ לְפָנִ֗ים בִּלְתִּֽי־נְבוֹנִ֤ים ׀ מֹרִים֨ תֹּעִ֔ים עֹֽבְדֵ֛י תַּֽאֲוֹ֥ת וְתַֽעֲנוּג֖וֹת שׁוֹנ֑וֹת מְבַלִּ֤ים חַיִּים֨ בְּרָעָ֣ה וּבְקִנְאָ֔ה נֶֽאֱלָחִ֕ים שֹֽׂנְאִ֖ים אִ֥ישׁ אֶת־רֵעֵֽהוּ ׃ 4 אַ֣ךְ ׀ כַּֽאֲשֶׁ֣ר הוֹפִ֗יעַ ט֤וּב הָֽאֱלֹהִים֨ מֽוֹשִׁיעֵ֔נוּ וְאַֽהֲבָת֖וֹ לִבְנֵ֥י אָדָֽם ׃ 5 לֹ֚א בְּמַֽעֲשֵׂ֣י צֶ֔דֶק אֲשֶׁ֥ר עָשִׂ֖ינוּ אֲנָ֑חְנוּ כִּי֩ אִם־כְּפִ֨י חַסְדּ֜וֹ הוֹשִׁ֣יעַ אֹתָ֗נוּ בְּרַחְצַת֨ הַמּוֹלֶ֣דֶת הַֽחֲדָשָׁ֔ה וְחִדּ֖וּשׁ ר֥וּחַ הַקֹּֽדֶשׁ ׃ 6 אֲשֶׁ֛ר שָׁפַ֥ךְ עָלֵ֖ינוּ בַּֽעֲתָ֑רֶת עַל־יְדֵ֛י יֵשׁ֥וּעַ הַמָּשִׁ֖יחַ מֽוֹשִׁיעֵֽנוּ ׃ 7 לְמַ֛עַן בְּהִצָּֽדְקֵ֥נוּ בְחַסְדּ֖וֹ נִהְיֶ֣ה לְיֽוֹרְשִּׁ֑ים כְּפִ֥י תִקְוַ֖ת חַיֵּ֥י עֽוֹלָמִֽים ׃ 8 נֶֽאֱמָן֘ הַדָּבָר֒ וְאֵ֣ת ׀ הַדְּבָרִ֣ים הָאֵ֗לֶּה חָפֵ֤ץ אֲנִי֨ כִּ֣י תַֽחֲלִ֔יט לְמַ֤עַן יִדְאֲגוּ֨ הַמַּֽאֲמִינִ֣ים בֵּֽאלֹהִ֔ים לְהִתְעוֹלֵ֖ל בְּמַֽעֲשִׂ֣ים טוֹבִ֑ים דְּבָרִ֣ים אֵ֔לֶּה הֵ֛ם הַטּוֹבִ֥ים וְהַמּֽוֹעִילִ֖ים לִבְנֵ֥י הָֽאָדָֽם ׃ 9 אַךְ֩ מִשְּׁאֵל֨וֹת סִכְל֜וּת וּמִתּֽוֹלָד֗וֹת וּמִמְּרִיב֧וֹת וּמִמַּצּ֛וֹת עַ֥ל הַתּוֹרָ֖ה הִנָּזֵ֑ר כִּ֥י הֵ֛נָּה בִּבְלִ֥י תוֹעֶ֖לֶת וְהָֽבֶל ׃ 10 מֵאִ֣ישׁ פֹּרֵ֔שׁ אַֽחֲרֵ֧י הַזְהָרָ֛ה אַחַ֥ת וּשְׁתַּ֖יִם הִשָּׁאֵֽל ׃ 11 בְּדַעְתְּךָ֕ כִּ֥י נֶהְפַּ֖ךְ אִ֣ישׁ כָּזֶ֑ה וְחֹטֵ֣א ה֔וּא בִּהְיוֹת֥וֹ נִרְשָׁ֖ע בְּנַפְשֽׁוֹ ׃ 12 כַּֽאֲשֶׁ֣ר ׀ אֶשְׁלַ֣ח אֵלֶ֗יךָ אֶת־אַרְטְמַס֨ א֣וֹ אֶת־טֽוּכִיק֔וֹס חֲרַ֛ץ לָב֥וֹא אֵלַ֖י לְנִקֹֽפֹלִ֑יס כִּ֥י שָׁ֖ם פִּלַּֽלְתִּי לַֽחֲרֹֽף ׃ 13 אֶת־זֶנֵ֨ס יוֹדֵ֧עַ הַתּוֹרָ֛ה וְאֶת־אַפֹּלּ֖וֹס לַוֵּ֣ה בַֽחֲרִיצ֑וּת לְמַ֛עַן לֹֽא־יֶחְסַ֥ר לָהֶ֖ם מְאֽוּמָה ׃ 14 וְיִלְמְד֞וּ גַּם־אֵ֣לֶּה ׀ אֲשֶׁ֣ר לָ֗נוּ לְהִתְעוֹלֵ֛ל בְּמַֽעֲשִׂ֥ים טוֹבִ֖ים לְשִׁמּוּשִׁ֣ים נִצְרָכִ֑ים לְמַ֛עַן לֹ֥א יִהְי֖וּ בְּלִי־פֶֽרִי ׃ 15 כָּל־אֵ֨לֶּה אֲשֶׁ֤ר עִמִּי֨ שֹֽׁאֲלִ֣ים לִשְׁלֽוֹמְךָ֔ שְׁאַ֣ל לִשְׁל֔וֹם הָאֹֽהֲבִ֥ים אֹתָ֖נוּ בֶּֽאֱמוּנָ֑ה חֵ֥ן עִם־כֻּלְּכֶ֖ם אָמֵֽן ׃

לאגרת שאול אל פילימון








להפעלת המסגרות
load frameset