1 אַחַ֕י לֹ֣א ׀ בִּנְשִׂיאַ֣ת פָּנִ֗ים תְּהִ֨י לָכֶ֜ם אֱמוּנַ֧ת אֲדֹנֵ֛ינוּ יֵשׁ֥וּעַ הַמָּשִׁ֖יחַ אֲד֥וֹן הַכָּבֽוֹד ׃ 2 כִּ֡י אִם־בָּא֩ בְּבֵ֨ית כְּנֵֽסַתְכֶ֜ם אִ֗ישׁ בַּ֛עַל טַבַּ֥עַת זָהָ֖ב בִּלְב֣וּשׁ בָּהִ֑יר וּבָ֥א שָׁ֛מָּה גַּ֥ם עָנִ֖י בִּלְב֥וּשׁ צוֹאִֽי ׃ 3 וְאַתֶּ֨ם מַבִּיטִ֜ים עַל־הָֽעֹטֶ֨ה אֶת־הַלְב֤וּשׁ הַבָּהִיר֨ וְאֹֽמְרִ֣ים אֵלָ֔יו אַתָּ֛ה שְׁבָ֥ה פֹ֖ה הֵיטֵ֑ב וְאֶל־הֶֽעָנִ֣י ׀ אַתֶּ֣ם אֹֽמְרִ֗ים אַתָּה֨ עֲמֹ֣ד שָׁ֔ם א֤וֹ שֵׁ֣ב פֹּ֔ה מִתַּ֖חַת הֲד֥וֹם רַגְלָֽי ׃ 4 הַאִ֛ם לֹ֥א הִבְדַּלְתֶּ֖ם בְּנַפְשְׁכֶ֑ם וְנִהְיֵיתֶ֕ם לְשֹֽׁפְטֵ֖י מַֽחֲשָׁב֥וֹת רָעֽוֹת ׃ 5 שִׁמְע֖וּ אַחַ֣י הָֽאֲהוּבִ֑ים הֲלֹא֩ בָחַ֨ר הָֽאֱלֹהִ֜ים בַּֽעֲנִיֵּ֣י ׀ הַתֵּבֵ֣ל הַזֹּ֗את הָֽעֲשִׁירִים֨ בָּֽאֱמוּנָ֔ה וְיֹֽרְשֵׁי֨ הַמַּלְכ֔וּת אֲשֶׁ֥ר הִבְטִ֖יחַ לְאֹֽהֲבָֽיו ׃ 6 אַ֣ךְ אַתֶּ֔ם נִבַּלְתֶּ֖ם אֶת־הֶֽעָנִ֑י הֲלֹ֤א הָֽעֲשִׁירִים֨ עֹֽשְׁקִ֣ים אֶתְכֶ֔ם וְהֵ֛ם מֹֽשְׁכִ֥ים אֶתְכֶ֖ם אֶל־בָּתֵּ֥י הַמִּשְׁפָּֽט ׃ 7 הֲלֹ֥א הֵ֨מָּה֨ מְגַדְּפִ֔ים אֶת־הַשֵּׁ֥ם הַטּ֖וֹב הַנִּקְרָ֥א עֲלֵיכֶֽם ׃ 8 אִם־אָמְנָם֩ אַתֶּ֨ם מְקִימִ֜ים אֶת־תּוֹרַ֤ת הַמַּלְכוּת֨ כְּפִ֣י הַכְּתָ֔ב וְאָֽהַבְתָּ֥ לְרֵֽעֲךָ֖ כָּמ֑וֹךָ תֵּטִ֖יבוּ לַֽעֲשֽׂוֹת ׃ 9 אַ֚ךְ אִם־תִּשְּׂא֣וּ פָנִ֔ים חֵ֖טְא אַתֶּ֣ם פֹּֽעֲלִ֑ים וּמֽוּכָחִ֛ים מֵאֵ֥ת הַתּוֹרָ֖ה כְּעֹֽבְרִֽים ׃ 10 כִּ֗י מִ֣י אֲשֶׁ֤ר יִשְׁמֹר֨ אֵ֣ת כָּל־הַתּוֹרָ֔ה וְיִגֹּ֖ף בְּאֶחָ֑ת נִהְיָ֥ה אָשֵׁ֖ם בְּכֻלָּֽן ׃ 11 כִּ֗י הָֽאֹמֵר֨ לֹ֣א תִנְאַ֔ף גַּ֥ם אָמַ֖ר לֹ֣א תִרְצָ֑ח וְאִ֨ם לֹ֤א תִנְאַף֨ אַ֣ךְ תִּרְצַ֔ח נִהְיֵ֖יתָ עֹבֵ֥ר הַתּוֹרָֽה ׃ 12 כֵּ֥ן תְּדַבְּר֖וּ וְכֵ֣ן תַּֽעֲשׂ֑וּ כְּמוֹ֨ הָֽעֲתִידִ֣ים לְהִשָּׁפֵ֔ט עַל־יְדֵ֖י תּוֹרַ֥ת הַֽחָפְשֽׁוּת ׃ 13 כִּ֗י מִשְׁפָּט֨ בְּלִ֣י רַֽחֲמִ֔ים לְלֹ֥א עֹשֶׂ֖ה רַֽחֲמִ֑ים וְיִתְהַלְל֥וּ הָרַֽחֲמִ֖ים נֶ֥גֶד הַמִּשְׁפָּֽט ׃
14 מָ֣ה הַתּוֹעֶלֶת֘ אַחַי֒ אִם־יֹאמַ֣ר אִ֗ישׁ כִּ֚י יֵֽשׁ־ל֣וֹ אֱמוּנָ֔ה וּמַֽעֲשִׂ֖ים אֵ֣ין ל֑וֹ הֲתוּכַ֥ל הָֽאֱמוּנָ֖ה לְהוֹשִׁ֥יעַ אֹתֽוֹ ׃ 15 וְאִ֥ם אָח֨ א֣וֹ אָח֔וֹת יִהְי֖וּ עֲרוּמִ֑ים וַֽחֲסֵרֵ֖י לֶ֥חֶם יוֹמָֽם ׃ 16 וְאִ֨ישׁ מִכֶּ֜ם יֹאמַ֣ר אֲלֵיהֶ֗ם לְכ֤וּ לְשָׁלוֹם֨ הֵחַ֣מּוּ וּשְׂבָ֔עוּ אַ֛ךְ לֹֽא־תִתְּנ֥וּ לָהֶ֖ם אֶת־צָרְכֵ֣י הַגְּוִיָּ֑ה מָ֖ה הַתּוֹעָֽלֶת ׃ 17 כֵּ֖ן גַּ֣ם הָֽאֱמוּנָ֑ה אִ֤ם מַֽעֲשִׂים֨ אֵ֣ין לָ֔הּ מֵתָ֥ה הִ֖יא בְּעַצְמָ֥הּ ׀ לְבַדָּֽהּ ׃ 18 אוּלָם֨ יֹ֣אמַר אִ֔ישׁ אַתָּ֗ה אֱמוּנָה֨ יֵ֣שׁ לְךָ֔ וַֽאֲנִ֖י מַֽעֲשִׂ֣ים יֵֽשׁ־לִ֑י הַרְאֵ֤נִי אֶת־אֱמוּנָֽתְךָ֨ בִּבְלִ֣י מַֽעֲשֶׂ֔יךָ וַֽאֲנִ֨י אַראֶ֧ה אֹֽתְךָ֛ מִמַּֽעֲשַׂ֖י אֶת־אֱמֽוּנָתִֽי ׃ 19 אַתָּ֣ה מַֽאֲמִ֔ין כִּ֥י הָֽאֱלֹהִ֖ים אֶחָ֣ד ה֑וּא אַתָּה֨ מֵטִ֣יב לַֽעֲשׂ֔וֹת גַּ֧ם הַשֵּׁדִ֛ים מַֽאֲמִינִ֖ים וְרֹֽעֲדִֽים ׃ 20 אַ֛ךְ הֲתִרְצֶ֥ה לָדַ֖עַת הָאִ֣ישׁ הָרֵ֑ק כִּ֧י הָֽאֱמוּנָ֛ה בִּבְלִ֥י מַֽעֲשִׂ֖ים מֵתָ֥ה הִֽיא ׃ 21 הַאִ֨ם לֹ֥א נִצְדַּ֛ק אַבְרָהָ֥ם אָבִ֖ינוּ מִמַּֽעֲשִׂ֑ים בְּהַֽעֲלוֹת֛וֹ אֶת־יִצְחָ֥ק בְּנ֖וֹ עַל־הַמִּזְבֵּֽחַ ׃ 22 הֲרֹאֶ֣ה אַתָּ֔ה כִּ֥י הָֽאֱמוּנָ֖ה פָּֽעֲלָ֣ה עִם־מַֽעֲשָׂ֑יו וּמִן־הַמַּֽעֲשִׂ֖ים נִשְׁלְמָ֥ה הָֽאֱמוּנָֽה ׃ 23 וַיִּמָּלֵ֨א הַכְּתָ֜ב הָֽאֹמֵ֗ר וְהֶֽאֱמִ֤ין אַבְרָהָם֨ בֵּֽאלֹהִ֔ים וַתֵּחָ֥שֶׁב ל֖וֹ לִצְדָקָ֑ה וְאֹהֵ֥ב אֱלֹהִ֖ים נִקְרָֽא ׃ 24 וְעַתָּה֨ אַתֶּ֣ם רֹאִ֔ים כִּ֥י מִמַּֽעֲשִׂ֖ים נִצְדָּ֣ק אִ֑ישׁ וְלֹ֖א מֵֽאֱמוּנָ֥ה לְבָֽד ׃ 25 וּכְמוֹ־כֵ֗ן גַּ֚ם רָחָ֣ב הַזּוֹנָ֔ה הֲלֹ֥א מִמַּֽעֲשִׂ֖ים נִצְדָּ֑קָה כַּֽאֲשֶׁ֤ר קִבְּלָה֨ אֶת־הַמַּלְאָכִ֔ים וְשִׁלְּחָ֥ה אֹתָ֖ם בְּדֶ֥רֶךְ אַחֵֽר ׃ 26 כִּ֗י כַּֽאֲשֶׁ֧ר הַגְּוִיָּ֛ה בִּבְלִ֥י ר֖וּחַ מֵתָ֣ה הִ֑יא כֵּ֗ן גַּ֧ם הָֽאֱמוּנָ֛ה בִּבְלִ֥י מַֽעֲשִׂ֖ים מֵתָ֥ה הִֽיא ׃
לפרק הבא