1 מֵאַ֛יִן מִלְחָמ֥וֹת וּמַצּ֖וֹת בָּכֶ֑ם הַֽאִם־לֹ֣א מִזֶּ֔ה מִתַּֽאֲוֹֽתֵיכֶ֖ם הַנִּלְחָמ֥וֹת בְּאֶבְרֵיכֶֽם ׃ 2 אַתֶּ֨ם מִתְאַוִּ֜ים וְאֵ֣ין לָכֶ֗ם אַתֶּ֤ם מְמִיתִים֨ וּמְקַנְאִ֔ים וְאֵֽינְכֶ֥ם יְכֹלִ֖ים לְהַשִּׂ֑יג אַתֶּ֣ם ׀ נִצִּ֣ים וְנִלְחָמִ֗ים אַ֚ךְ אֵ֣ין לָכֶ֔ם יַ֖עַן אֵֽינְכֶ֥ם שֹֽׁאֲלִֽים ׃ 3 אַתֶּ֤ם שֹֽׁאֲלִים֨ וְאֵֽינְכֶ֣ם לֹֽקְחִ֔ים יַ֕עַן רַ֖ע אַתֶּ֣ם שֹֽׁאֲלִ֑ים לְמַ֥עַן תְּאַכְּל֖וּ בְּתַֽאֲוֹֽתֵיכֶֽם ׃ 4 הַנֹּֽאֲפִים֘ וְהַנֹּֽאֲפוֹת֒ הֲלֹ֣א יְדַעְתֶּ֔ם כִּ֚י אַֽהֲבַ֣ת הָֽעוֹלָ֔ם אֵיבַ֥ת הָֽאֱלֹהִ֖ים הִ֑יא לָכֵ֗ן כָּל־אֲשֶׁ֤ר יַחְפֹּץ֨ לִהְיוֹת֨ אֹהֵ֣ב הָֽעוֹלָ֔ם לְאֹיֵ֥ב הָֽאֱלֹהִ֖ים הוּשָֽׂם ׃ 5 א֤וֹ הַמְדַמִּ֣ים אַתֶּ֔ם כִּ֥י לָרִ֖יק אֹמֵ֣ר הַכְּתָ֑ב כִּ֗י בְּקִנְאָ֛ה מִתְאַוָּ֥ה הָר֖וּחַ הַשֹּׁכֵ֥ן בָּֽנוּ ׃ 6 אַ֚ךְ ה֣וּא נוֹתֵ֔ן חֵ֖ן גָּד֣וֹל יָ֑תֶר עַל־כֵּ֞ן ה֣וּא אֹמֵ֗ר הָֽאֱלֹהִים֨ יִתְנַגֵּ֣ד לַזֵּדִ֔ים וְלַֽעֲנָוִ֖ים יִתֵּ֥ן חֵֽן ׃ 7 לָכֵ֖ן הִכָּֽנְע֣וּ לָֽאֱלֹהִ֑ים הִתְנַגְּד֥וּ אֶל־הַשָּׂטָ֖ן וְיִבְרַ֥ח מִכֶּֽם ׃ 8 קִרְב֥וּ אֶל־הָֽאֱלֹהִ֖ים וְיִקְרַ֣ב אֲלֵיכֶ֑ם טַֽהֲר֤וּ יְדֵיכֶם֨ הַֽחַטָּאִ֔ים וְקַדְּשׁ֥וּ אֶת־לִבּֽוֹתֵיכֶ֖ם כְּפוּלֵ֥י הַנָּֽפֶשׁ ׃ 9 הָצֵ֥רוּ וְהִתְאַבְּל֖וּ וּבְכ֑וּ שְׂחֽוֹקְכֶם֨ יֵֽהָפֵ֣ךְ לְאֵ֔בֶל וְשִׂמְחַתְכֶ֖ם לְיָגֽוֹן ׃ 10 הַשְׁפִּ֥ילוּ עַצְמְכֶ֖ם לִפְנֵ֣י יְהֹוָ֑ה וִֽירוֹמֵ֖ם אֶתְכֶֽם ׃
11 אַל־תְּלַשְּׁנ֞וּ אִ֣ישׁ אֶת־רֵעֵהוּ֘ אַחַי֒ הַמְּלַשֵּׁ֤ן אֶת־אָחִיו֨ וְהַשֹּׁפֵ֣ט אֶת־אָחִ֔יו מְלַשֵּׁ֥ן אֶת־הַתּוֹרָ֖ה וְשֹׁפֵ֣ט אֶת־הַתּוֹרָ֑ה אַ֗ךְ אִ֤ם אֶת־הַתּוֹרָה֨ אַתָּ֣ה שֹׁפֵ֔ט אֵֽינְךָ֨ עֹשֵׂ֣ה הַתּוֹרָ֔ה כִּ֖י אִם־שֹׁפֵֽט ׃ 12 אֶחָ֥ד הוּא֨ הַמְּחוֹקֵ֔ק הַיָּכֹ֥ל לְהוֹשִׁ֖יעַ וּלְאַבֵּ֑ד אַתָּה֨ מִ֣י אַ֔תָּה כִּ֥י תִשְׁפֹּ֖ט אֶת־הָֽאַחֵֽר ׃
13 הָ֣בָה עַתָּ֔ה הָאֹֽמְרִ֗ים הַיּוֹם֨ א֣וֹ מָחָ֔ר נֵֽלְכָ֖ה אֶל־עִ֣יר כָּזֹ֑את וְנַֽעֲשֶׂ֥ה שָׁם֨ שָׁנָ֣ה אַחַ֔ת וְנִסְחֲרָ֖ה וְנִקְנֶ֥ה בָֽצַע ׃ 14 אֲשֶׁר֨ אֵֽינְכֶ֣ם יֽוֹדְעִ֔ים אֵ֖ת דִּבְרֵ֣י הַמָּחָ֑ר כִּ֚י מָ֣ה חַיֵּיכֶ֔ם אֵ֥ד הֵ֨מָּה֨ הַנִּרְאֶ֣ה לַמִּצְעָ֔ר וְאַֽחֲרֵי־כֵ֖ן יִכְלֶֽה ׃ 15 תַּ֛חַת אֲשֶׁ֥ר לָכֶ֖ם לֵאמֹ֑ר אִם־יִרְצֶ֤ה יְהֹוָה֨ וְנִחְיֶ֔ה נַֽעֲשֶׂ֥ה כָזֹ֖את א֥וֹ כָזֹֽאת ׃ 16 וְעַתָּ֕ה אַתֶּ֥ם מִתְהַלְלִ֖ים בִּתְרֽוּעַתְכֶ֑ם כָּל־הִתְהַלְל֥וּת כָּזֹ֖את רָ֥עָה הִֽיא ׃ 17 לָכֵ֗ן הַיּוֹדֵ֨עַ לַֽעֲשׂ֥וֹת טוֹב֨ וְאֵינֶ֣נּוּ עֹשֶׂ֔ה חֵ֥טְא ה֖וּא לֽוֹ ׃
לפרק הבא