לפרק הקודם

הבשורה על־פי מתי
פרק ג

יוחנן המטביל וקריאתו

1 וּבַיָּמִ֣ים הָהֵ֔ם בָּ֖א יֽוֹחָנָ֣ן הַמְּטַבֵּ֑ל וַיִּקְרָ֖א בְּמִדְבַּ֥ר יְהוּדָֽה : 2 וַֽיֹּאמַ֑ר שׁ֕וּבוּ כִּ֥י קְרֹבָ֖ה מַלְכ֥וּת הַשָּׁמָֽיִם : 3 כִּ֚י זֶ֣ה ה֔וּא הַנֶּֽאֱמָ֣ר עָלָ֗יו בְּפִ֛י יְשַׁעְיָ֥הוּ הַנָּבִ֖יא לֵאמֹ֑ר ק֨וֹל קוֹרֵ֜א בַּמִּדְבָּ֗ר פַּנּוּ֨ דֶּ֣רֶךְ יְהוָֹה֔ יַשְּׁר֖וּ מְסִלּוֹתָֽיו : 4 וְזֶ֣ה יֽוֹחָנָ֗ן לְבוּשׁ֤וֹ הָיָה֨ מִשְּׂעַ֣ר גָּמָ֔ל וְאֵז֥וֹר ע֖וֹר עַל־מָתְנָי֑ו וּמַֽאֲכָל֔וֹ חֲגָבִ֖ים וּדְבַ֥שׁ הַיָּֽעַר : 5 אָ֠ז יָֽצְא֥וּ אֵלָי֛ו יְרֽוּשָׁלַ֥םִ וְכָל־יְהוּדָ֖ה וְכָל־כִּכַּ֥ר הַיַּרְדֵּֽן : 6 וַיִּטָּֽבְל֥וּ בַיַּרְדֵּ֖ן מֵֽאִתּ֑וֹ בְּהִתְוַדּ֖וֹת חַטֹּֽאתֵיהֶֽם : 7 וּ֠בִרְאֹתוֹ רַבִּ֨ים מִן־הַפְּרוּשִׁ֧ים וּמִן־הַצַּדּוּקִ֛ים בָּאִ֥ים לִטְבִֽילָת֖וֹ וַיֹּ֣אמֶר לָהֶ֑ם יְלִידֵ֣י צִפְעוֹנִ֗ים מִ֚י הִגִּ֣יד לָכֶ֔ם לִבְרֹ֕חַ מִפְּנֵ֖י הֶֽחָר֥וֹן הַבָּֽא : 8 לָכֵ֕ן עֲשׂ֥וּ פְּרִ֖י נָאוֶ֥ה לַתְּשׁוּבָֽה : 9 וְאַל־תַּחְשְׁבוּ֨ לֵאמֹ֣ר בְּנַפְשְׁכֶ֔ם אָ֥ב יֵֽשׁ־לָנ֖וּ אַבְרָהָ֑ם כִּ֞י אֲנִ֣י ׀ אֹמֵ֣ר לָכֶ֗ם כִּ֚י מִן־הָֽאֲבָנִ֣ים הָאֵ֔לֶּה יוּכַ֣ל הָֽאֱלֹהִ֔ים לְהָקִ֥ים בָּנִ֖ים לְאַבְרָהָֽם : 10 וְעַתָּ֕ה גַּ֣ם הַגַּרְזֶ֔ן הוּשַׂ֖ם עַל־שֹׁ֣רֶשׁ הָֽעֵצִ֑ים לָכֵ֗ן כָּל־עֵ֞ץ אֲשֶׁ֨ר אֵינֶנּ֤וּ עֹשֶׂה֨ פְּרִ֣י ט֔וֹב יִגָּדֵ֖עַ וְיֻשְׁלַ֥ךְ אֶל־הָאֵֽשׁ : 11 אָכֵ֣ן אֲנִ֗י מְטַבֵּ֨ל אֶתְכֶ֥ם בְּמַיִם֘ לִתְשׁוּבָה֒ אַ֗ךְ הַבָּ֤א אַֽחֲרַי֨ חָזָ֣ק מִמֶּ֔נִּי אֲשֶׁ֛ר אֵינֶ֥נִּי שֹׁוֶ֖ה לָשֵׂ֣את נְעָלָ֑יו ה֚וּא יְטַבֵּ֣ל אֶתְכֶ֔ם בְּר֥וּחַ הַקֹּ֖דֶשׁ וּבָאֵֽשׁ : 12 אֲשֶׁ֤ר מִזְרֵ֨הוּ֨ בְּיָד֔וֹ וְטַהֵ֖ר יְטַהֵ֣ר אֶת־גָּרְנ֑וֹ וְיֶֽאֱסֹ֤ף אֶת־דְּגָנוֹ֨ אֶל־הָֽאָסָ֔ם וְאֶת־הַמֹּ֣ץ יִשְׂרֹ֔ף בָּאֵ֖שׁ אֲשֶׁ֥ר לֹֽא־תִכְבֶּֽה :

טבילת ישוע

13 אָ֠ז בָּ֣א יֵשׁ֧וּעַ מִן־הַגָּלִ֛יל אֶל־הַיַּרְדֵּ֖ן אֶל־יוֹֽחָנָ֑ן לְהִטָּבֵ֖ל מֵֽאִתּֽוֹ : 14 אַ֧ךְ יֽוֹחָנָ֛ן הֵנִ֥יא אֹת֖וֹ וַיֹּאמַ֑ר צֹ֤רֶךְ לִי֨ לְהִטָּבֵ֣ל מֵֽאִתְּךָ֔ וְאַתָּ֖ה בָּ֥א אֵלָֽי : 15 וַיַּ֨עַן יֵשׁ֜וּעַ וַיֹּ֣אמֶר אֵלָ֗יו הַנִּ֨יחָה֨ עַתָּ֔ה כִּי־כֵן֨ יָֽאֲתָ֣ה לָ֔נוּ לְמַלֵּ֖א כָּל־צְדָקָ֑ה אָ֖ז הִנִּ֥יחַ לֽוֹ : 16 וּכְהִטָּבֵ֣ל יֵשׁ֔וּעַ וַיַּ֥עַל כְּרֶ֖גַע מִן־הַמָּ֑יִם וְהִנֵּה֩ נִפְתְּח֨וּ ל֜וֹ הַשָּׁמַ֗יִם וַיַּ֞רְא אֶת־ר֨וּחַ הָֽאֱלֹהִ֤ים יֹרֶ֨דֶת֨ כְּמ֣וֹ יוֹנָ֔ה וְנָחָ֖ה עָלָֽיו : 17 וְהִנֵּ֛ה ק֥וֹל מִן־הַשָּׁמַ֖יִם אֹמֵ֑ר זֶ֚ה בְּנִ֣י יְדִידִ֔י אֲשֶׁ֛ר רָֽצְתָ֥ה נַפְשִׁ֖י בּֽוֹ :

לפרק הבא








להפעלת המסגרות
load frameset