לפרק הקודם

הבשורה על־פי מתי
פרק ד

ישוע עומד בניסיון

1 אָ֗ז הוּבָ֥א יֵשׁ֛וּעַ בְּיַ֥ד הָר֖וּחַ הַמִּדְבָּ֑רָה לְהִנָּס֖וֹת מֵאֵ֥ת הַשָּׂטָֽן : 2 וּכְצוּמ֛וֹ אַרְבָּעִ֥ים י֖וֹם וְאַרְבָּעִ֣ים לָ֑יְלָה אַֽחֲרֵי־כֵ֖ן רָעֵֽב : 3 וַיִּגַּ֥שׁ אֵלָ֛יו הַמְּנַסֶּ֖ה וַיֹּאמַ֑ר אִ֤ם בֶּן־הָֽאֱלֹהִים֨ אַתָּ֔ה אֱמֹ֕ר כִּ֛י הָֽאֲבָנִ֥ים הָאֵ֖לֶּה תִּהְיֶ֥ינָה לָּֽחֶם : 4 וַיַּ֖עַן וַיֹּאמַ֑ר כָּת֕וּב לֹ֣א עַל־הַלֶּ֤חֶם לְבַדּוֹ֨ יִחְיֶ֣ה הָֽאָדָ֔ם כִּ֚י עַל־כָּל־דָּבָ֔ר הַיּוֹצֵ֖א מִפִּ֥י אֱלֹהִֽים : 5 אָ֕ז לְקָח֥וֹ הַשָּׂטָ֖ן אֶל־עִ֣יר הַקֹּ֑דֶשׁ וַיַּֽעֲמִידֵ֖הוּ עַל־כְּנַ֥ף הֵֽהֵיכָֽל : 6 וַיֹּאמֶר֘ אֵלָיו֒ אִ֤ם בֶּן־הָֽאֱלֹהִים֨ אַתָּ֔ה הַשְׁלֵ֥ךְ עַצְמְךָ֖ מָ֑טָּה כִּ֣י כָת֗וּב כִּ֤י מַלְאָכָיו֨ יְצַוֶּה־לָּ֔ךְ וְעַל־כַּפַּ֨יִם֨ יִשָּׂאֽוּנְךָ֔ פֶּן־תִּגּ֥וֹף בָּאֶ֖בֶן רַגְלֶֽךָ : 7 וַיֹּ֥אמֶר אֵלָ֖יו יֵשׁ֑וּעַ ע֣וֹד כָּת֔וּב לֹ֣א תְנַסֶּ֔ה אֵ֖ת יְהוָֹ֥ה אֱלֹהֶֽיךָ : 8 וְעוֹד֨ לְקָח֣וֹ הַשָּׂטָ֔ן אֶל־הַ֖ר גָּבֹ֣הַּ מְאֹ֑ד וַיַּרְאֵ֕הוּ אֶת־כָּל־מַמְלְכ֥וֹת הַתֵּבֵ֖ל וְתִפְאַרְתָּֽן : 9 וַיֹּ֖אמֶר אֵלָי֑ו אֶת־כָּל־אֵ֨לֶּה֨ אֶתֵּ֣ן לְךָ֔ אִם־תִּפֹּ֖ל וְתִשְׁתַּֽחֲוֶ֥ה לִֽי : 10 וַ֤יֹּאמֶר אֵלָיו֨ יֵשׁ֔וּעַ ס֥וּר לְךָ֖ שָׂטָ֑ן כִּ֣י כָת֗וּב לַֽיהוָֹ֤ה אֱלֹהֶ֨יךָ֨ תִּשְׁתַּֽחֲוֶ֔ה וְאֹת֥וֹ לְבַ֖דּוֹ תַּֽעֲבֹֽד : 11 אָ֕ז עָזַ֥ב אֹת֖וֹ הַשָּׂטָ֑ן וְהִנֵ֗ה מַלְאָכִ֛ים נִגְּשׁ֥וּ אֵלָ֖יו וַיְשָֽׁרְת֥וּ אֹתֽוֹ :

ישוע מתחיל את שליחותו בגליל

12 וְכִשְׁמֹ֣עַ יֵשׁ֗וּעַ כִּ֤י הָסְגַּר֨ יֽוֹחָנָ֔ן וַיֵּ֥לֶךְ ל֖וֹ הַגָּלִֽילָה : 13 וַיַּֽעֲזֹ֖ב אֶת־נָצָ֑רֶת וַיָּבֹ֗א וַיֵּ֤שֶׁב בִּכְפַר־נַחוּם֨ אֲשֶׁר֙ עַל־שְׂפַ֣ת הַיָּ֔ם בִּגְבוּלֵ֥י זְבוּל֖וּן וְנַפְתָּלִֽי : 14 לְמַ֣עַן יִמָּלֵ֔א הַנֶּֽאֱמָ֗ר בְּפִ֛י יְשַׁעְיָ֥הוּ הַנָּבִ֖יא לֵאמֹֽר : 15 אַ֥רְצָה זְבוּל֖וּן וְאַ֣רְצָה נַפְתָּלִ֑י דֶּ֤רֶךְ הַיָּם֨ עֵ֣בֶר הַיַּרְדֵּ֔ן גְּלִ֖יל הַגּוֹיִֽם : 16 הָעָם֨ הַיֹּֽשְׁבִ֣ים בַּחֹ֔שֶׁךְ רָא֖וּ א֣וֹר גָּד֑וֹל וְיֽוֹשְׁבֵי֨ בְּאֶ֣רֶץ צַלְמָ֗וֶת א֖וֹר נָגַ֥הּ עֲלֵיהֶֽם : 17 מִן־הָעֵ֣ת הַהִ֔יא הֵחֵ֣ל יֵשׁ֔וּעַ לִקְרֹ֖א וְלֵאמֹ֑ר שׁ֕וּבוּ כִּ֥י קְרֹבָ֖ה מַלְכ֥וּת הַשָּׁמָֽיִם :

הקריאה לארבעה דייגים

18 וּבְהִתְהַלֵּ֨ךְ יֵשׁ֜וּעַ עַל־יַ֣ד ׀ יַ֣ם הַגָּלִ֗יל רָאָה֩ שְׁנֵ֨י אַחִ֜ים אֶת־שִׁמְע֨וֹן הַנִּקְרָ֤א פֶטְרוֹס֨ וְאֶת־אַנְדְּרֵעַ֣ס אָחִ֔יו מַשְׁלִיכִ֥ים מִכְמֹ֖רֶת בַּיָּ֑ם כִּ֥י הָי֖וּ דַּיָּגִֽים : 19 וַיֹּ֖אמֶר אֲלֵיהֶ֑ם לְכוּ֨ אַֽחֲרַ֔י וְאֶֽעֱשֶׂ֥ה אֶתְכֶ֖ם לְדַיְגֵ֥י אָדָֽם : 20 וּכְרֶ֕גַע עָֽזְב֖וּ אֶת־הַמַּכְמֹרִ֑ים וַיֵּֽלְכ֖וּ אַֽחֲרָֽיו : 21 וַיַּֽעֲבֹר֘ מִשָּׁם֒ וַיַּ֡רְא שְׁנֵ֣י אַחִ֣ים אֲ֠חֵרִים אֶת־יַֽעֲקֹ֨ב בֶּן־זַבְדַּ֜י וְאֶת־יֽוֹחָנָ֣ן אָחִ֗יו בָּֽאֳנִיָּה֨ עִם־זַבְדַּ֣י אֲבִיהֶ֔ם מְתַקְּנִ֖ים מַכְמֹֽרֵיהֶ֑ם וַיִּקְרָ֖א אֲלֵיהֶֽם : 22 וּכְרֶ֛גַע עָֽזְב֥וּ אֶת־הָֽאֳנִיָּ֖ה וְאֶת־אֲבִיהֶ֑ם וַיֵּֽלְכ֖וּ אַֽחֲרָֽיו :

ישוע משרת את ההמונים

23 וַיָּ֨סָב יֵשׁ֜וּעַ אֵ֣ת כָּל־הַגָּלִ֗יל וַיְלַמֵּד֨ בְּבָתֵּ֣י כְנֵסִיּֽוֹתֵיהֶ֔ם וַיִּקְרָ֖א אֶת־בְּשׂוֹרַ֣ת הַמַּלְכ֑וּת וַיִּרְפָּ֛א כָּל־מַֽחֲלָ֥ה וְכָל־מַכְא֖וֹב בָּעָֽם : 24 וַיֵּצֵ֥א שִׁמְע֖וֹ בְּכָל־אֲרָ֑ם וַיָּבִ֨יאוּ אֵלָ֜יו אֵ֣ת כָּל־הַֽחוֹלִ֗ים הַנִּלְחָצִים֩ בְּתַֽחֲלֻאִ֨ים שׁוֹנִ֜ים וּמַכְאֹבִ֗ים וַֽאֲחֻזֵ֥י שֵׁדִ֛ים וּמֻכֵּֽי־יָרֵ֥חַ וּנְכֵֽי־אֲבָרִ֖ים וַיִּרְפָּאֵֽם : 25 וַיֵּֽלְכ֥וּ אַֽחֲרָ֖יו הֲמוֹנִ֣ים רַבִּ֑ים מִן־הַגָּלִ֤יל וְקִרְיַת־עֶ֨שֶׂר֨ וִירֽוּשָׁלַ֔םִ וִֽיהוּדָ֖ה וְעֵ֥בֶר הַיַּרְדֵּֽן :

לפרק הבא








להפעלת המסגרות
load frameset