לפרק הקודם

הבשורה על־פי מתי
פרק כד

ישוע מנבא חורבן וצרות

1 וַיֵּצֵ֥א יֵשׁ֛וּעַ וַיֵּ֥לֶךְ ל֖וֹ מִן־הַֽהֵיכָ֑ל וַיִּגְּשׁ֣וּ תַלְמִידָ֔יו לְהַרְאֹת֖וֹ אֶת־בִּנְיָנֵ֥י הַֽהֵיכָֽל : 2 וַיֹּ֤אמֶר אֲלֵיהֶם֨ יֵשׁ֔וּעַ הַאֵֽינְכֶ֥ם רֹאִ֖ים אֶת־כָּל־אֵלֶּ֑ה אָמְנָ֞ם אֲנִ֣י ׀ אֹמֵ֣ר לָכֶ֗ם לֹֽא־תִשָּׁאֵ֥ר פֹּה֨ אֶ֣בֶן עַל־אֶ֔בֶן אֲשֶׁ֖ר לֹ֥א תִתְפָּרֵֽק : 3 וְכַֽאֲשֶׁ֤ר יָשַׁב֨ עַל־הַ֣ר הַזֵּיתִ֔ים וַיִּגְּשׁ֨וּ אֵלָ֧יו הַתַּלְמִידִ֛ים לְבָדָ֖ד וַיֹּאמֵ֑רוּ אֱמֹ֣ר לָ֗נוּ מָתַי֨ יִהְי֣וּ אֵ֔לֶּה וּמָ֥ה א֛וֹת בִּיאָֽתְךָ֖ וְקֵ֥ץ הָֽעוֹלָֽם : 4 וַיַּ֥עַן יֵשׁ֖וּעַ וַ֣יֹּאמֶר אֲלֵיהֶ֑ם רְא֕וּ כִּ֛י לֹֽא־יַתְעֶ֥ה אֶתְכֶ֖ם אִֽישׁ : 5 כִּ֣י רַבִּ֞ים יָבֹ֧אוּ בִּשְׁמִ֛י לֵאמֹ֖ר אֲנִ֣י הַמָּשִׁ֑יחַ וְיַתְע֖וּ רַבִּֽים : 6 וַֽעֲתִידִ֨ים אַתֶּ֜ם לִשְׁמ֤וֹעַ מִלְחָמוֹת֨ וּשְׁמוּע֣וֹת מִלְחָמ֔וֹת רְא֕וּ כִּ֖י לֹ֣א תִבָּהֵ֑לוּ כִּ֗י צָרִיךְ֨ לִהְי֣וֹת כָּל־אֵלֶּ֔ה אַ֛ךְ לֹ֥א ע֖וֹד הַקֵּֽץ : 7 כִּ֤י יָקוּם֨ גּ֣וֹי עַל־גּ֔וֹי וּמַמְלָכָ֖ה עַל־מַמְלָכָ֑ה וְיִהְי֨וּ רָעָ֥ב וְדֶ֛בֶר וְרַ֖עַשׁ בִּמְקוֹמ֥וֹת שֹׁנִֽים : 8 כָּל־אֵ֕לֶּה הֵ֖ם רֵאשִׁ֥ית חֲבָלִֽים : 9 אָ֞ז יַסְגִּי֤רוּ אֶתְכֶם֨ אֶל־מְצוּקָ֔ה וְיָמִ֖יתוּ אֶתְכֶ֑ם וְתִהְי֧וּ שְׂנוּאִ֛ים לְכָל־הַגּוֹיִ֖ם בַּֽעֲב֥וּר שְׁמִֽי : 10 וְאָ֖ז יִכָּֽשְׁל֣וּ רַבִּ֑ים וְיַסְגִּ֨ירוּ֨ אִ֣ישׁ אֶת־רֵעֵ֔הוּ וְיִשְׂנְא֖וּ אִ֥ישׁ אֶת־רֵעֵֽהוּ : 11 וְרַבִּ֛ים נְבִ֥יאֵי שֶׁ֖קֶר יָק֑וּמוּ וְיַתְע֖וּ רַבִּֽים : 12 וּמִפְּנֵי֨ עֲתֶ֣רֶת הָרֶ֔שַׁע תִּתְקָרֵ֖ר אַֽהֲבַ֥ת הָֽרַבִּֽים : 13 אַ֗ךְ הַמְּיַחֵל֨ עַד־הַקֵּ֔ץ ה֖וּא יִוָּשֵֽׁעַ : 14 וְתִקָּרֵא֩ בְשׂוֹרַ֨ת הַמַּלְכ֜וּת הַזֹּאת֨ בְּכָל־הַתֵּבֵ֔ל לְעֵד֖וּת לְכָל־הַגּוֹיִ֑ם וְאָ֖ז יָב֥וֹא הַקֵּֽץ :

צרה גדולה

15 לָכֵ֗ן כַּֽאֲשֶׁ֨ר תִּרְא֜וּ אֶת־שִּׁקּ֣וּץ הַשַּׁמָּ֗ה הַנֶּֽאֱמָר֨ עַל־פִּי֨ דָּנִיּאֵ֣ל הַנָּבִ֔יא עֹמֵ֖ד בְּמָק֣וֹם קָד֑וֹשׁ הַקֹּרֵ֖א יָבִֽין : 16 אָ֗ז אֵ֚לֶּה אֲשֶׁ֣ר בִּֽיהוּדָ֔ה יָנ֖וּסוּ אֶל־הֶֽהָרִֽים : 17 וְזֶ֖ה אֲשֶׁ֣ר עַל־הַגָּ֑ג לֹ֣א יֵרֵ֔ד לָשֵׂ֥את מְא֖וּמָה מִבֵּיתֽוֹ : 18 וְזֶ֖ה אֲשֶׁ֣ר בַּשָּׂדֶ֑ה לֹֽא־יָשׁ֣וּב אָח֔וֹר לָשֵׂ֖את אֶת־בְּגָדָֽיו : 19 אַ֗ךְ א֛וֹי לֶהָר֥וֹת וְלַמֵּינִיק֖וֹת בַּיָּמִ֥ים הָהֵֽם : 20 אַ֖ךְ הִתְפַּלֵּ֑לוּ לְ֠מַעַן לֹ֣א תִהְיֶ֧ה מְנֽוּסַתְכֶ֛ם בַּחֹ֖רֶף גַּם־לֹ֥א בַשַּׁבָּֽת : 21 כִּי֩ אָ֨ז תִּהְיֶ֜ה מְצוּקָ֣ה גְדוֹלָ֗ה אֲשֶׁ֤ר כָּמ֨וֹהָ֨ לֹ֣א הָֽיְתָ֔ה מֵֽרֵאשִׁ֥ית הָֽעוֹלָ֖ם עַד־עַתָּ֑ה וְגַ֖ם לֹא־תִהְיֶ֥ה עֽוֹד : 22 וְלוּלֵ֗א יְקֻצְּרוּ֨ הַיָּמִ֣ים הָהֵ֔ם לֹ֥א יִוָּשֵׁ֖עַ כָּל־בָּשָׂ֑ר אַ֚ךְ לְמַ֣עַן הַבְּחִירִ֗ים יְקֻצְּר֖וּ הַיָּמִ֥ים הָהֵֽם : 23 אָ֗ז אִם־יֹאמַ֤ר אֲלֵיכֶם֨ אִ֔ישׁ הִנֵּ֛ה פֹּ֥ה הַמָּשִׁ֖יחַ א֣וֹ פֹּ֑ה אַל־תַּֽאֲמִֽינוּ : 24 כִּ֥י יָק֛וּמוּ מְשִׁ֥יחֵי שֶׁ֖קֶר וּנְבִי֣אֵי שָׁ֑קֶר וְיִתְּנוּ֩ אוֹת֨וֹת גְּדוֹלִ֜ים וּמֽוֹפְתִ֗ים עַ֧ד לְהַתְע֛וֹת אִם־יוּכַל֥ לִהי֖וֹת גַּ֥ם אֶת־הַבְּחִירִֽים : 25 הִנֵּ֕ה מֵרֹ֖אשׁ הִגַּ֥דְתִּי לָכֶֽם : 26 לָכֵ֞ן אִם־יֹֽאמְר֣וּ אֲלֵיכֶ֗ם הִנֵּ֛ה בַּמִּדְבָּ֥ר ה֖וּא אַל־תֵּצְ֑אוּ הִנֵּ֥ה בַֽחֲדָרִ֖ים אַל־תַּֽאֲמִֽינוּ : 27 כִּ֡י כַּֽאֲשֶׁר֩ הַבָּרָ֨ק יוֹצֵ֤א מִן־הַמִּזְרָח֨ וּמֵאִ֣יר עַד־הַמַּֽעֲרָ֔ב כֵּ֣ן תִּהְיֶ֔ה גַּ֖ם בִּיאַ֥ת בֶּן־הָֽאָדָֽם : 28 כִּ֛י בַּֽאֲשֶׁ֖ר יִהְיֶ֣ה הַפָּ֑גֶר שָׁ֖ם יִקָּֽבְצ֥וּ הַנְּשָׁרִֽים :

בואו של בן־האדם

29 וּכְרֶ֗גַע אַֽחֲרֵי֨ מְצוּקַת֨ הַיָּמִ֣ים הָהֵ֔ם תֶּחְשַׁ֣ךְ הַשֶּׁ֗מֶשׁ וְהַיָּרֵ֨חַ֨ לֹֽא־יִתֵּ֣ן אוֹר֔וֹ וְהַכּֽוֹכָבִ֖ים יִפְּל֣וּ מִן־הַשָּׁמַ֑יִם וְכֹח֥וֹת הַשָּׁמַ֖יִם יִנּֽוֹעוּ : 30 וְאָ֧ז יֵֽרָאֶ֛ה א֥וֹת בֶּן־הָֽאָדָ֖ם בַּשָּׁמָ֑יִם וְאָ֨ז יִסְפְּד֜וּ כָּל־שִׁבְטֵ֣י הָאָ֗רֶץ וְיִרְא֤וּ אֶת־בֶּן־הָֽאָדָם֨ בָּ֚א בְּעַנְנֵ֣י הַשָּׁמַ֔יִם בִּגְבוּרָ֖ה וּבְתִפְאֶ֥רֶת גְּדוֹלָֽה : 31 וְיִשְׁלַח֨ אֶת־מַלְאָכָ֔יו בְּק֥וֹל שׁוֹפָ֖ר גָּד֑וֹל וִֽיקַבְּצ֤וּ אֶת־בְּחִירָיו֨ מֵֽאַרְבַּ֣ע הָֽרוּח֔וֹת מִקְּצ֥וֹת הַשָּׁמַ֖יִם עַד־קְצוֹתָֽם : 32 אַ֚ךְ מִן־הַתְּאֵנָ֔ה לִמְד֖וּ הַמָּשָׁ֑ל כַּֽאֲשֶׁ֗ר כְּבָ֞ר עֲנָפָ֨הּ נִהְיָ֥ה רַךְ֨ וְהֶֽעָלִ֣ים צֹֽמְחִ֔ים יֽוֹדְעִ֣ים אַתֶּ֔ם כִּ֥י קָר֖וֹב הַקָּֽיִץ : 33 כְּמוֹ־כֵ֖ן גַּ֣ם אַתֶּ֑ם תִּרְאוּ֨ אֶת־כָּל־אֵ֔לֶּה דְּע֕וּ כִּ֛י קָר֥וֹב ה֖וּא עַל־הַדְּלָתֽוֹת : 34 אָמְנָ֕ם אֲנִ֖י אֹמֵ֣ר לָכֶ֑ם כִּ֗י לֹ֤א יַחֲלֹף֨ הַדּ֣וֹר הַזֶּ֔ה עַ֥ד כִּֽי־יִהְי֖וּ כָּל־אֵֽלֶּה : 35 הַשָּׁמַ֥יִם וְהָאָ֖רֶץ יַֽחֲלֹ֑פוּ וּדְבָרַ֖י לֹ֥א יַֽחֲלֹֽפוּ : 36 אַ֞ךְ עַל־אֹד֨וֹת הַיּ֤וֹם הַהוּא֨ וְהַשָּׁעָ֔ה אֵ֥ין אִישׁ֨ יוֹדֵ֔עַ וְגַ֥ם לֹ֖א מַלְאֲכֵ֣י הַשָּׁמַ֑יִם בִּלְתִּ֥י אָבִ֖י לְבַדּֽוֹ : 37 וְכַֽאֲשֶׁ֤ר הָיוּ֨ יְמֵ֣י נֹ֔חַ כֵּ֣ן תִּהְיֶ֔ה גַּ֖ם בִּיאַ֥ת בֶּן־הָֽאָדָֽם : 38 כִּ֡י כַּֽאֲשֶׁ֣ר הָ֠יוּ בַּיָּמִ֞ים אֲשֶׁ֣ר ׀ לִפְנֵ֣י הַמַּבּ֗וּל אֹֽכְלִים֨ וְשֹׁתִ֔ים נֹֽשׂאִ֥ים נָשִׁ֖ים וּמַשִּׂיאִ֣ים לַֽאֲנָשִׁ֑ים עַ֨ד־הַיּ֔וֹם אֲשֶׁ֛ר בָּ֥א נֹ֖חַ אֶל־הַתֵּבָֽה : 39 וְלֹ֣א יָֽדְע֗וּ עַ֚ד כִּי־בָ֣א הַמַּבּ֔וּל וְנָשָׂ֖א אֶת־כֻּלָּ֑ם כֵּ֣ן תִּהְיֶ֔ה גַּ֖ם בִּיאַ֥ת בֶּן־הָֽאָדָֽם : 40 אָ֕ז שְׁנַ֖יִם יִהְי֣וּ בַשָּׂדֶ֑ה הָֽאֶחָ֣ד יִלָּקֵ֔חַ וְהָֽאֶחָ֖ד יֵֽעָזֵֽב : 41 שְׁתַּ֖יִם טֹֽחֲנ֣וֹת בָּֽרֵחָ֑יִם אַחַת֨ תִּלָּקֵ֔חַ וְאַחַ֖ת תֵּֽעָזֵֽב : 42 לָכֵ֖ן שְׁקֹ֑דוּ כִּ֚י אֵֽינְכֶ֣ם יֽוֹדְעִ֔ים בְּאֵי־ז֥וּ שָׁעָ֖ה אֲדֽוֹנֵיכֶ֥ם בָּֽא : 43 אַ֖ךְ זֹ֣את דְּע֑וּ כִּ֠י אִם־יָדַ֨ע בַּֽעַל־הַבַּ֜יִת בְּאֵי־ז֤וּ אַשְׁמֹרָה֨ יָבֹ֣א הַגַּנָּ֔ב הָיָ֣ה שֹׁקֵ֔ד וְלֹ֥א הִנִּי֛חַ אֶת־בֵּית֖וֹ לְהֵֽחָתֵֽר : 44 בַּֽעֲב֣וּר זֹ֔את גַּ֥ם אַתֶּ֖ם הֱי֣וּ נְכוֹנִי֑ם כִּ֗י בַּשָׁעָה֨ אֲשֶׁ֣ר לֹֽא־תַחְשְׁב֔וּ בֶּן־הָֽאָדָ֖ם בָּֽא :

העבד הנאמן או הבלתי נאמן

45 מִ֣י ׀ אֵפ֣וֹא ה֗וּא הָעֶ֤בֶד הַנֶּֽאֱמָן֨ וְהַמַּשְׂכִּ֔יל אֲשֶׁ֨ר הִפְקִיד֤וֹ אֲדֹנָיו֨ עַל־עֲבֻדָּת֔וֹ לָתֵ֥ת לָהֶ֛ם הָאֹ֖כֶל בְּעִתּֽוֹ : 46 אַשְׁרֵ֖י הָעֶ֣בֶד הַה֑וּא אֲשֶׁר֩ יִמְצָ֨א אֹת֧וֹ אֲדֹנָי֛ו בְּבֹא֖וֹ עֹ֥שֶׂה כֵּֽן : 47 אָמְנָ֕ם אַנִ֖י אֹמֵ֣ר לָכֶ֑ם כִּ֛י עַ֥ל כָּל־קִנְיָנָ֖יו יַפְקִ֥יד אֹתֽוֹ : 48 אַ֗ךְ אִם־יֹאמַ֨ר הָעֶ֧בֶד הָרָ֛ע הַה֖וּא בְּלִבּ֑וֹ מְאַחֵ֥ר אֲדֹנִ֖י לָבֽוֹא : 49 וְיָחֵל֨ לְהַכּ֔וֹת אֶת־הָֽעֲבָדִ֖ים חֲבֵרָ֑יו וְלֶֽאֱכֹ֥ל וְלִשְׁתּ֖וֹת עִם־הַשִּׁכֹּרִֽים : 50 יָב֗וֹא אֲדוֹן֨ הָעֶ֣בֶד הַה֔וּא בְּיוֹ֖ם אֲשֶׁ֣ר לֹֽא־יְצַפֶּ֑ה וּבְשָׁעָ֖ה אֲשֶׁ֥ר לֹֽא־יֵדָֽע : 51 וִֽישַׁסֵּ֣ף אֹת֔וֹ וְיָשִׂ֥ים חֶלְ֖קוֹ עִ֣ם הַֽחֲנֵפִ֑ים שָׁ֣ם יִהְיֶ֔ה בְּכִ֖י וַֽחֲרִיקַ֥ת שִׁנָּֽיִם :

לפרק הבא








להפעלת המסגרות
load frameset