לפרק הקודם

הבשורה על־פי מתי
פרק כה

משל עשר העלמות

1 אָ֧ז תִּדָּמֶ֛ה מַלְכ֥וּת הַשָּׁמַ֖יִם לְעֶ֣שֶׂר עֲלָמ֑וֹת אֲשֶׁר֨ לָֽקְח֣וּ אֶת־נֵרֹֽתֵיהֶ֔ן וְיָֽצְא֖וּ לִקְרַ֥את הֶֽחָתָֽן : 2 וְחָמֵ֣שׁ מֵהֶ֔ן הָי֖וּ מַשְׂכִּי֑לוֹת וְהֶֽחָמֵ֖שׁ כְּסִילֽוֹת : 3 אֵ֚לֶּה אֲשֶׁ֣ר הָי֣וּ כְסִיל֔וֹת לָֽקְח֖וּ אֶת־נֵֽרֹתֵיהֶ֑ן וְלֹא־לָֽקְח֥וּ עִמָּהֶ֖ן שָֽׁמֶן : 4 וְהַמַּשְׂכִּיל֗וֹת לָֽקְח֥וּ שֶׁ֛מֶן בִּכְלֵיהֶ֖ן עִ֥ם נֵֽרֹתֵיהֶֽן : 5 וְכַֽאֲשֶׁ֥ר אֵחַ֖ר הֶֽחָתָ֑ן נָמ֥וּ כֻלָּ֖ן וְיָשֵֽׁנוּ : 6 וּבַֽחֲצוֹת֨ הַלַּ֔יְלָה הָֽיְתָ֖ה צְעָקָ֑ה הִנֵּה֨ הֶֽחָתָ֣ן בָּ֔א צְאֶ֖ינָה לִקְרָאתֽוֹ : 7 אָ֕ז קָ֖מוּ כָּל־הָֽעֲלָמ֣וֹת הָהֵ֑ן וְהֵטִ֖יבוּ אֶת־נֵֽרֹתֵיהֶֽן : 8 וַתֹּאמַ֥רְנָה הַכְּסִיל֖וֹת אֶל־הַמַּשְׂכִּיל֑וֹת תֵּ֤נָּה לָּנוּ֨ מִשַּׁמְנְכֶ֔ן כִּ֥י נֵֽרֹתֵ֖ינוּ דֹּֽעֲכִֽים : 9 וַתַּֽעֲנֶ֨ינָה הַמַּשְׂכִּיל֜וֹת לֵאמֹ֗ר אוּלַ֛י לֹֽא־יִשְׂפֹּ֥ק לָנ֖וּ וְלָכֶ֑ן אַ֗ךְ לֵ֤כְנָה בְיוֹתֵר֨ אֶל־הַמֹּֽכְרִ֔ים וּקְנֶ֖ינָה לָכֶֽן : 10 וְכַֽאֲשֶׁ֤ר הָֽלְכוּ֨ לִקְנ֔וֹת בָּ֖א הֶֽחָתָ֑ן וַֽאֲשֶׁר֩ הָי֨וּ נְכוֹנ֜וֹת בָּ֤אוּ אִתּוֹ֨ אֶל־בֵּי֣ת הַֽחֲתֻנָּ֔ה וַתִּסָּגֵ֖ר הַדָּֽלֶת : 11 וְאַֽחֲרֵ֣י כֵ֔ן בָּ֕אוּ גַּ֛ם שְׁאָ֥ר הָֽעֲלָמ֖וֹת לֵאמֹ֑ר אֲדֹנָ֥י ׀ אֲדֹנָ֖י פְּתַ֥ח לָֽנוּ : 12 אַ֥ךְ ה֛וּא עָנָ֖ה וַיֹּאמַ֑ר אָמְנָם֨ אֲנִ֣י אֹמֵ֣ר לָכֶ֔ן לֹ֥א יָדַ֖עְתִּי אֶתְכֶֽן : 13 לָכֵ֖ן שְׁקֹ֑דוּ כִּי֩ אֵֽינְכֶ֨ם יֽוֹדְעִ֜ים אֶת־הַיּ֗וֹם גַּ֚ם לֹ֣א אֶת־הַשָּׁעָ֔ה אֲשֶׁ֥ר בָּ֖הּ בֶּן־הָֽאָדָ֥ם בָּֽא :

משל כיכרי הכסף

14 כִּ֚י כְּמוֹ־אִ֔ישׁ הַנּוֹסֵ֖עַ לַמֶּרְחָ֑ק אֲשֶׁ֤ר קָרָא֨ אֶת־עֲבָדָ֣יו שֶׁלּ֔וֹ וַיִּמְסֹ֥ר לָהֶ֖ם אֶת־קִנְיָנָֽיו : 15 וְלָזֶ֞ה נָתַ֣ן ׀ חָמֵ֣שׁ כִּכָּרִ֗ים וְלָזֶ֤ה שְׁתַּ֨יִם֨ וְלָזֶ֣ה אַחַ֔ת לְכָל־אִ֕ישׁ כְּפִ֖י הַיְּכֹ֣לֶת שֶׁלּ֑וֹ וַיִּסַּ֥ע לַמֶּרְחָ֖ק כְּרָֽגַע : 16 וַיֵּ֜לֶךְ זֶ֣ה אֲשֶׁ֤ר לָקַח֨ אֶת־חָמֵ֣שׁ הַכִּכָּרִ֔ים וַיִּסְחַ֖ר בָּהֵ֑ן וַיַּ֛עַשׂ חָמֵ֥שׁ כִּכָּרִ֖ים אֲחֵרֽוֹת : 17 וּכְמוֹ־כֵ֕ן זֶ֛ה אֲשֶׁ֥ר לָקַ֖ח הַשְּׁתָּ֑יִם גַּם־ה֣וּא רָכַ֔שׁ שְׁתַּ֖יִם אֲחֵרֽוֹת : 18 אַ֣ךְ זֶ֨ה אֲשֶׁ֤ר לָקַח֨ הָֽאַחַ֔ת הָ֥לַךְ ל֖וֹ וְחָפַ֣ר בָּֽאֲדָמָ֑ה וְטָמַ֖ן אֶת־כֶּ֥סֶף אֲדֹנָֽיו : 19 וְאַֽחֲרֵי֨ זְמָ֣ן כַּבִּ֔יר בָּ֕א אֲד֖וֹן הָֽעֲבָדִ֣ים הָהֵ֑ם וַיִּקַּ֥ח מֵהֶ֖ם חֶשְׁבּֽוֹן : 20 וַיִּגַּ֣שׁ זֶ֗ה אֲשֶׁ֤ר לָקַח֨ אֶת־חָמֵ֣שׁ הַכִּכָּרִ֔ים וַיָּבֵ֗א חָמֵ֛שׁ כִּכָּרִ֥ים אֲחֵר֖וֹת לֵאמֹ֑ר אֲדֹנִ֕י חָמֵ֤שׁ כִּכָּרִים֨ מָסַ֣רְתָּ לִּ֔י הִנֵּ֗ה חָמֵ֧שׁ כִּכָּרִ֛ים אֲחֵר֖וֹת רָכַ֥שְׁתִּי עֲלֵיהֶֽן : 21 וַיֹּ֤אמֶר אֵלָיו֨ אֲדֹנָ֔יו יָפֶ֕ה הָעֶ֥בֶד הַטּ֖וֹב וְהַנֶּֽאֱמָ֑ן עַל־דְּבָרִ֨ים מְעַטִּ֜ים הָיִ֣יתָ נֶֽאֱמָ֗ן עַל־רַבִּים֨ אַפְקִ֣יד אֹֽתְךָ֔ בֹּ֖א אֶל־שִׂמְחַ֥ת אֲדֹנֶֽיךָ : 22 וַיִּגַּ֣שׁ גַּם־זֶ֗ה אֲשֶׁ֥ר לָקַ֛ח אֶת־שְׁתֵּ֥י הַכִּכָּרִ֖ים וַיֹּאמַ֑ר אֲדֹנִ֕י שְׁתֵּ֤י כִכָּרִים֨ מָסַ֣רְתָּ לִּ֔י הִנֵּ֗ה שְׁתֵּ֧י כִכָּרִ֛ים אֲחֵר֖וֹת רָכַ֥שְׁתִּי עֲלֵיהֶֽן : 23 וַיֹּ֤אמֶר אֵלָיו֨ אֲדֹנָ֔יו יָפֶ֕ה הָעֶ֥בֶד הַטּ֖וֹב וְהַנֶּֽאֱמָ֑ן עַל־דְּבָרִ֨ים מְעַטִּ֜ים הָיִ֣יתָ נֶֽאֱמָ֗ן עַל־רַבִּים֨ אַפְקִ֣יד אֹֽתְךָ֔ בֹּ֖א אֶל־שִׂמְחַ֥ת אֲדֹנֶֽיךָ : 24 וַיִּגַּ֣שׁ גַּם־זֶ֗ה אֲשֶׁ֥ר לָקַ֛ח הַכִּכָּ֥ר הָֽאַחַ֖ת וַיֹּאמַ֑ר אֲדֹנִ֗י בְּדַעְתִּ֨י אֹֽתְךָ֜ כִּ֣י אִ֤ישׁ קָשֶׁה֨ אַתָּ֔ה קֹצֵר֨ בַּֽאֲשֶׁ֣ר לֹֽא־זָרַ֔עְתָּ וְאֹסֵ֕ף מֵֽאֲשֶׁ֖ר לֹ֥א פִזָּֽרְתָּ : 25 וָֽאִירָא֨ וָֽאֵלֵ֔ךְ וָֽאֶטְמֹ֥ן כִּכָּֽרְךָ֖ בָּֽאֲדָמָ֑ה הִנֵּ֕ה יֵ֥שׁ לְךָ֖ אֲשֶׁר־לָֽךְ : 26 וַיַּ֥עַן אֲדֹנָ֖יו וַיֹּ֣אמֶר אֵלָ֑יו הָעֶ֤בֶד הָרָע֨ וְהֶֽעָצֵ֔ל יָדַ֗עְתָּ כִּ֣י אֲנִ֤י קֹצֵר֨ בַּֽאֲשֶׁ֣ר לֹֽא־זָרַ֔עְתִּי וְאֹסֵ֕ף מֵֽאֲשֶׁ֖ר לֹ֥א פִזָּֽרְתִּי : 27 לָכֵ֗ן צָרִיךְ֨ הָיָ֣ה לְךָ֔ לְהַשְׁלִ֥יךְ אֶת־כַּסְפִּ֖י אֶל־הַשֻּׁלְחָנִיִּ֑ים וּבְבוֹאִ֗י לָקַ֧חְתִּי אֲנִ֛י אֵ֥ת שֶׁלִּ֖י בְּתַרְבִּֽית : 28 עַל־כֵּ֕ן שְׂא֥וּ מִמֶּ֖נּוּ אֶת־הַכִּכָּ֑ר וּתְנ֣וּ לָזֶ֔ה אֲשֶׁ֛ר יֵ֥שׁ ל֖וֹ עֶ֥שֶׂר הַכִּכָּרִֽים : 29 כִּ֗י כֹּ֚ל אֲשֶׁ֣ר יֶשׁ־ל֔וֹ יִנָּ֥תֶן ל֖וֹ וְיַעְדִּ֑יף אַ֗ךְ מִזֶּה֨ אֲשֶׁ֣ר אֵ֣ין ל֔וֹ גַּ֗ם אֵ֛ת אֲשֶׁ֥ר יֶשׁ־ל֖וֹ יֻקַּ֥ח מִמֶּֽנּוּ : 30 וְאֵת֨ הָעֶ֣בֶד בְּלִֽי־יוֹעִ֔יל הַשְׁלִ֖יכוּ אֶל־הַחֹ֣שֶׁךְ הַֽחִיצ֑וֹן שָׁ֣ם יִהְיֶ֔ה בְּכִ֖י וַֽחֲרִיקַ֥ת שִׁנָּֽיִם :

משפט העמים

31 וְכַֽאֲשֶׁ֨ר יָב֤וֹא בֶן־הָֽאָדָם֨ בִּכְבוֹד֔וֹ וְכֹ֛ל הַמַּלְאָכִ֥ים הַקְּדוֹשִׁ֖ים עִמּ֑וֹ אָ֕ז יֵשֵׁ֖ב עַל־כִּסֵּ֥א כְבוֹדֽוֹ : 32 וְיִקָּֽבְצ֥וּ לְפָנָ֖יו כָּל־הַגּוֹיִ֑ם וְיַפְרִ֤יד אֹתָם֨ אֵ֣לֶּה מֵאֵ֔לֶּה כַּֽאֲשֶׁ֨ר יַפְרִ֧יד הָֽרֹעֶ֛ה אֶת־הַצֹּ֖אן מִן־הַגְּדָיִֽים : 33 וְיַצִּ֥יג אֶת־הַצֹּ֖אן לִֽימִינ֑וֹ וְאֶת־הַגְּדָיִ֖ים לִשְׂמֹאלֽוֹ : 34 אָ֚ז יֹאמַ֣ר הַמֶּ֔לֶךְ לָאֵ֖לֶּה אֲשֶׁ֣ר מִֽימִינ֑וֹ בֹּ֣אוּ ׀ בְּרוּכֵ֣י אָבִ֗י רְשׁוּ֨ אֶת־הַמַּלְכ֔וּת הַמּֽוּכָנָ֣ה לָכֶ֔ם מִ֖ן הִוָּסֵ֥ד הַתֵּבֵֽל : 35 כִּ֣י רָעַ֗בְתִּי וּנְתַתֶּ֥ם לִי֨ לֶֽאֱכֹ֔ל צָמֵ֖אתִי וְהִשְׁקִיתֶ֣ם אֹתִ֑י גֵּ֥ר הָיִ֖יתִי וְאִסַּפְתֶּ֥ם אֹתִֽי : 36 עָרֹם֨ וְכִסִּיתֶ֣ם אֹתִ֔י חֹלֶ֥ה הָיִ֖יתִי וּבִקַּרְתֶּ֣ם אֹתִ֑י בְּמִשְׁמָ֣ר הָיִ֔יתִי וּבָאתֶ֖ם אֵלָֽי : 37 אָ֠ז יַֽעֲנ֥וּ אֹת֛וֹ הַצַּדִּיקִ֖ים לֵאמֹ֑ר אֲדֹנָ֗י מָתַ֞י רָאִ֨ינוּ אֹֽתְךָ֤ רָעֵב֨ וְהֶֽאֱכַ֔לְנוּ א֥וֹ צָמֵ֖א וְהִשְׁקִֽינוּ : 38 וּמָתַ֗י רָאִ֧ינוּ אֹֽתְךָ֛ גֵּר֖ וְאִסַּ֑פְנוּ א֥וֹ עָר֖וֹם וְכִסִּֽינוּ : 39 וּמָתַ֞י רָאִ֨ינוּ אֹֽתְךָ֧ חֹלֶה֨ א֣וֹ בְמִשְׁמָ֔ר וּבָ֖אנוּ אֵלֶֽיךָ : 40 וְיַֽעֲנֶ֥ה הַמֶּ֖לֶךְ וְיֹאמַ֣ר אֲלֵיהֶ֑ם אָמנָ֗ם אֲנִי֨ אֹמֵ֣ר לָכֶ֔ם בַּֽאֲשֶׁ֣ר עֲשִׂיתֶ֗ם לְאֶחָ֨ד מֵֽאַחַ֥י אֵ֨לֶה֨ הַצְּעִירִ֔ים לִ֖י עֲשִׂיתֶֽם : 41 אָ֚ז יֹאמַ֔ר גַּ֥ם לָאֵ֖לֶּה אֲשֶׁ֣ר מִשְּׂמֹאל֑וֹ ס֣וּרוּ מִמֶּ֤נִּי ׀ הָֽאֲרוּרִים֨ אֶל־אֵ֣שׁ עוֹלָ֔ם הַמּֽוּכָנָ֥ה לַשָּׂטָ֖ן וּלְמַלְאָכָֽיו : 42 כִּ֣י רָעַ֔בְתִּי וְלֹֽא־נְתַתֶּ֥ם לִ֖י לֶֽאֱכֹ֑ל צָמֵ֕אתִי וְלֹ֥א הִשְׁקִיתֶ֖ם אֹתִֽי : 43 גֵּ֣ר הָיִ֗יתִי וְלֹ֤א אִסַּפְתֶּם֙ אֹתִ֔י עָר֕וֹם וְלֹ֥א כִסִּיתֶ֖ם אֹתִ֑י חֹלֶה֨ וּבְמִשְׁמָ֔ר וְלֹ֥א בִקַּרְתֶּ֖ם אֹתִֽי : 44 אָ֠ז יַֽעֲנ֥וּ אֹת֛וֹ גַּ֥ם הֵ֖מָּה לֵאמֹ֑ר אֲדֹנָ֗י מָתַי֩ רָאִ֨ינוּ אֹֽתְךָ֜ רָעֵ֨ב אֽוֹ־צָמֵ֤א אוֹ־גֵר֨ אֽוֹ־עָר֤וֹם אֽוֹ־חֹלֶה֨ א֣וֹ בְמִשְׁמָ֔ר וְלֹ֥א שֵׁרַ֖תְנוּ אֹתָֽךְ : 45 אָ֛ז יַֽעֲנֶ֥ה אֹתָ֖ם לֵאמֹ֑ר אָמְנָ֗ם אֲנִי֨ אֹמֵ֣ר לָכֶ֔ם בַּֽאֲשֶׁ֣ר לֹֽא־עֲשִׂיתֶ֗ם לְאֶחָד֨ מִן־הַצְּעִירִ֣ים הָאֵ֔לֶּה גַּ֥ם לִ֖י לֹ֥א עֲשִׂיתֶֽם : 46 וְיֵֽלְכ֥וּ אֵ֖לֶּה לְעֹ֣נֶשׁ עוֹלָ֑ם וְהַצַּדִּיקִ֖ים לְחַיֵּ֥י עוֹלָֽם :

לפרק הבא








להפעלת המסגרות
load frameset